【平民投資教室】錢俊：ETF通有無著數
平民投資教室
日期：2022-06-14
更新時間：08:54:32
上月中證監同香港證監會公告「ETF通」計劃,即係讓香港投資者可以投資內地掛牌嘅ETF,同時國內投資者可以買香港上市嘅ETF。計劃準備於將兩個月後推出。作為ETF KOL嘅錢俊
當然要睇嚇有無著數。
2007年市場曾經炒作「港股直通車」,憧憬國內投資者會狂掃港股刺激股市,助恆指當時三個月內升咗一萬點。今日ETF通會否引入更多投資者有利港股前景?錢俊認為唔大可能。符合賣俾國內投資者「南向ETF通」要求頗為嚴格,ETF必須以港元計價、資產規模唔少於17億元,且唔包合成ETF或槓桿及反向產品。另對追蹤指數都要求,例如追蹤指數嘅成份股入面港交所上市股票權重不低於90%等。因此最初符合要求嘅ETF會係恒指、國指、恒生科指等主流ETF,而內地目前已有追蹤相同指數嘅ETF。亦即係要投資嘅,一早買咗。想有新資金炒熱港股,睇怕唔可能。
雖然對港股無乜影響,但香港投資者或有更多A股ETF選擇。由於內地ETF種類及規模遠超港股,市場估計合資格賣俾香港投資者嘅ETF數目或遠較香港賣上去嘅多。近年熱炒嘅新能源、電動車、電池、醫療等公司,好多只喺內地上市。A股ETF除咗有更多元化嘅選擇外,收費或可以比香港上市嘅A股ETF低。
然而A股市場多為散戶主導,好多行業嘅波動性比港股有過之而無不及,或需要睇準時機短炒或超長線投資。
2810:東盟股票唔怕加息
喺近二百幾隻香港上市ETF入面,除反向、商品或債券ETF以外,大多今年都係跌到慘不忍睹。其中一隻表現仍然較硬淨嘅實貨股票ETF喺PREMIA 道瓊斯新興東盟頂尖 100 ETF(HKG:2810)。基金投資泰國、馬來西亞、印尼、菲律賓和越南五個高增長新興東盟國家嘅公司。尤記得1997年亞洲金融風暴,當年由泰國開始受衝擊,該國股市曾跌75%,而印尼及馬來西亞匯市亦急跌80%及50%。然而經歷上一次教訓,東盟多國政府喺財政狀況上都已經有明顯改善及堆好更穩健嘅防波堤。比如泰國嘅外匯儲備已經達2440億美元,比英國及法國仲要多。因此出現1997年情況嘅機會好細。
好多人關注東盟股票會否因為美國加息及美元升值而令其吸引力減少或出現走資情況。然而睇2810嘅表現,年初至今回報雖然蝕4.2%,但派息亦有2.2%,拉勻已經跑嬴曬主要金融市場。
錢俊認為呢個同基金成份股有關,佔比最重嘅金融類別有33%,其次係必需消費品、通訊服務同工業各佔10%左右。由於好多投資亞洲嘅基金都或股票指數都重倉資訊科技巨頭,包括ATM以及三星同台積電,喺美國加息及美債息向上時,顯然影響呢類高風險投資嘅誘因,相比之下2810重倉行業嘅波動性相對較少。因此可用作分散亞洲投資過於專注嘅風險。
基金於2018年成立,想知道較長嘅回報歷史就要參考其追蹤嘅指數,當中十年年化表現僅為3.2%,略嫌感覺比上不足。
想聽其他投資Topic?話我知:chinjun.column@gmail.com
FB: chinjun.etf
IG: chinjun.column
平民投資教室 - 錢俊 舊文
本文作轉載及備份之用 來源 source: http://hksmedia.com