笑到最後｜細數美帝得 其他國家唔得案例（高明）
笑到最後｜細數美帝得 其他國家唔得案例（高明）
最後笑唔笑得出，回到本欄嘅基礎假設，就係美國背後國力嘅霸權能否維持，如果可以，佢出咩產品出嚟，最後都會成為獨當一面嘅巨無霸。
最近嘅美股走勢非常貼切本欄嘅欄命「笑到最後」，因為大部份人都應該
笑唔出，所以只有寄望最後可以笑。
美股、外匯、加密貨幣免費即時報價，自選投資組合獲取相關新聞提示。
至於最後笑唔笑得出，回到本欄嘅基礎假設，就係美國背後國力嘅霸權能否維持，如果可以，佢出咩產品出嚟，最後都會成為獨當一面嘅巨無霸。好似當下大台YouTube咁，影片分享概諗大把人諗到同做到，崛起之初喺其他地區做，就係侵犯版權，唯獨是美國做，先出到YouTube並且融入成Google（GOOGL）一部份。
又例如網購，比起亞馬遜（AMZN），遠東都曾有商人大搞網上買貨，概念仲前過阿馬遜本身，因為後者當年剛渡過科網泡沫爆破，業務主力賣緊書。結果遠東版唔成功，美版得咗，帶動全球遍地開花，幾乎每個地區都有一個唔同版本嘅亞馬遜。
通脹加息吹大咗
再講近期因為油價上升而大賣（股價未必係）嘅電動車。高明好細個去東京旅行，入過一間豐田半陳列半展覽廳嘅地方，當年已經有未來概念車，整到成架太空戰士咁，但係標榜未來用電（估計佢日文係咁寫）。以及後來無數車廠及非車廠嘅商人整電動車，最後發揚光大，都係要返美帝Tesla（TSLA）。
講開日本，可以話近代錯失未來嘅表表者，當中錯失嘅最大市場就係手機。大家仲玩緊Nokia（NOK電話業務已售）貪食蛇嘅年代，日本人已經可以手機收發電郵、睇棒球直播。當年摺機一機難求，日本打死唔出口，最後相同概念由蘋果（AAPL）收割，三星跟隨，日本依家喺手機市場連登尾都望唔到，所以做人唔使太氣餒，望嚇日本，成個職人之國又有創意又勤力，最重要係做先，都可以錯失機會，大家錯失都唔係太出奇，此乃後話。
至於美股走勢，通脹加息呢啲係系統性內嘅事，本欄認為吹大咗，至於滯脹，物價上升但經濟差，影響嘅係一般公民，對於美股已上市嘅霸權，本身係生產要素，一邊享受加價一邊等勞動成本下降，本來要受惠，你睇油價就知。繼續買美股，就係睇好呢個霸權唔會崩潰，信定唔信，自己諗囉。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com