操盤手劄記│一周三單市場奇譚（割柑人）
操盤手劄記│一周三單市場奇譚（割柑人）
螞蟻上周五再傳出重啟上市消息，其後又被中證監否認。
美國聯儲局上周宣布加息0.75厘，係1994年以嚟最大加幅。主席鮑威爾上月仲講緊「not actively considering a 0.75% i
ncrease」，但面對40年一遇嘅通脹唯有就範；不過，市場人士如對沖基金大亨阿克曼、新債王岡拉克等，仍嫌儲局遏抑通脹未夠決心，顯然當局係對經濟衰退忌憚。雖然股債市場喺議息後隨即進入relief-rally mode，但後勁不繼，上周五美股「四巫日」（指數期貨、期權；股票期貨、期權四期結算），道指再跌38點，未能重上三萬關。
環球央行掀加息潮，上周繼美國後，英國、瑞士、匈牙利、阿根廷都宣布加息。疫情、戰爭打亂供應鏈，通脹飆升，息魔抬頭，股債滙市受驚。近期市場波譎雲詭，上周就有幾單奇譚。其一，內地網傳有香港金融機構炒燶債券蝕100億美元，最先傳係外資投行，後來傳係中資大行，再後來傳係中資銀行系券商，係蝕100億元人民幣。歐資行、中資行紛紛發聲否認涉事，包括瑞銀、中銀香港（2388）、工銀國際等。
螞蟻重啟上市 一而再食詐糊
其二，阿里巴巴（9988）持股33%嘅螞蟻集團，2020年11月滬港上市臨門撻Q後，重啟IPO一而再食詐糊。上周五《路透社》引述知情人士稱，中國人民銀行已受理螞蟻成立金融控股公司嘅申請，被視為係螞蟻整改、再IPO嘅關鍵一步，但其後《財聯社》引述接近央行人士稱，目前央行並無受理。此前一周，《彭博社》亦曾引述消息稱，中證監已設立小組評估螞蟻售股計劃，但其後中證監、螞蟻先後否認重啟IPO工作。
受消息左右，阿里巴巴美股盤前曾升逾一成，收市只升0.8%，折算港股計，則較港股跌4%。螞蟻上市真係詐糊？近期中國向市場發出監管緩和訊號，最有說服力嘅做法，莫過於放生揭開監管風暴序幕嘅螞蟻。螞蟻重啟IPO亦有跡可尋，集團月初加入港交所（388）主席史美倫為獨立董事，史美倫同中證監淵源深厚，前總理朱鎔基主政時已出任中證監副主席，現時仍任中證監國際顧問委員會副主席。然而即使螞蟻上市，估值料較兩年前縮水三分二。
俄國走資成疑 香港恐被制裁
其三，上周五俄羅斯聖彼得堡證券交易所（SPB Exchange）宣布，本周一起准許經紀買賣港交所上市嘅股票，首批12隻，包括ATMXJ、舜宇（2382）、碧桂園（2007）、金沙（1928）、中生製藥（1177）、萬洲（288）、長和（001）同長實（1113）。事件引起市場擔心港交所同香港會否被國際制裁，皆因俄烏開戰後，俄國被國際制裁，而開放港股有如畀俄國走資到一個同美元掛鈎嘅城市。
有趣嘅係，港交所回應話無同對方合作，相信只係對方自行推出嘅全球發行人推廣計劃一部分。查實俄羅斯最大嘅證券交易所係莫斯科交易所，而聖彼得堡交易所喺2014年已聲稱可買賣標普500嘅股票，換言之，該交易所只係場外交易平台，遑論同其他交易所合作。Anyway，俄水蓄勢流入，港交所上周五炒高2%；不過，筆者無意追貨，始終覺得事件長遠對港交所有風險。
市場消息彈出彈入，見怪不怪，現時市況波譎雲詭，盡力管理風險。
割柑人
曾任財經記者、編輯，在本港報章撰寫財經專欄逾十年
www.fb.com/hkstockpicker
本欄逢周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com