操盤手劄記│FedEx使命不達 顯衰退殺到（割柑人）
操盤手劄記│FedEx使命不達 顯衰退殺到（割柑人）
FedEx業績走樣，除咗反映宏觀經濟不景，亦反映企業喺高通脹下嘅兩個「螺旋」——「工資—通脹螺旋」、「利潤—通脹螺旋」。
上周五，美滙指數一度重上110，收109.64；美債
孳息方面，1年期突破4厘，2年期突破3.9厘，10年期逼近3.5厘。美股「四巫日」（指數期貨、期權；股票期貨、期權四期結算），道指、標指、納指分別跌0.5%、0.7%、0.9%；反映中概股表現嘅金龍中國指數跌4.3%，港股ADR比例指數低水0.5%。本周焦點係美國聯儲局議息，本港時間周四淩晨2時揭盅；同日，日本央行、英倫銀行等多家央行亦議息。
美股、外匯、加密貨幣免費即時報價，自選投資組合獲取相關新聞提示。
睇返美國經濟數據，8月CPI、核心CPI嘅按年、按月升幅都高過預期；8月零售銷售、工業生產持續轉弱，反映通脹削弱消費能力；9月密歇根大學消費者信心報告，1年、5年通脹預期都低過預期，則反映通脹前景趨緩；上周首次申領失業救濟人數少過預期，連續5周改善，就反映就業市場持續復甦。數據未差到只能加息0.5厘，又未強到可以加息1厘，估計今趟都係0.75厘。
世銀憂明年陷毀滅性衰退
正當環球央行普遍大手加息遏制通脹之際，上周四、五，國際貨幣基金組織（IMF）同世界銀行（World Bank）先後警告，此舉或將招致明年多國甚至全球經濟衰退。世銀指出，現時全球同步退出貨幣及財政刺激措施嘅速度係半世紀首見，由於各國緊縮政策力度一致，效用互相加強，若主要央行喺未來幾個月將利率升得過高，重創金融市場，明年全球經濟可能陷入「毀滅性」衰退！
其實唔使國基會同世銀警告，睇美國運輸速遞龍頭FedEx初步季度業績「使命不達」，又撤回6月發出嘅全年業績指引，就知環球經濟唔掂。事實上，FedEx CEO 直指「全球經濟即將步入衰退」，又指「我們是一面鏡子，反映了所有人的業務」。運輸業一向被視為經濟寒暑表，運輸指數回落，反映貨品運輸需求轉弱，經濟亦轉弱，而目前道瓊斯運輸指數已形成短期頭肩頂嘅逆轉訊號。
「3張紅底」藍籌股已消失
FedEx業績走樣，除咗反映宏觀經濟不景，亦反映企業喺高通脹下嘅兩個「螺旋」——「工資—通脹螺旋」、「利潤—通脹螺旋」。FedEx早於上年業績已表明因勞工短缺、工資上升，令人力成本上升，利潤下跌；今次季績則表明將大幅削減成本。不過，通脹預期引發工人要求增加工資，而工資增加又會推升通脹，亦即通脹second-round effect；同樣，雖然成本上升蠶食利潤，但亦有類似效應。FedEx股價上周五跌21.4%，更拖跌電商股、包裝股。
講返港股，市場擔心全球經濟衰退，恒指上周五跟隨外圍下跌，失守18800支持，收18761。恒指過去3個月沿住下降通道尋底，料將下試3月低位18235。藍籌股中，最大價嘅騰訊（700）、港交所（388），上周五都失守300元關口，分別收293.2元、295.6元，「3張紅底」嘅藍籌消失！然而，無論騰訊定港交所都未宜撈底，因騰訊大股東Naspers減持比預期急進，而港交所則受制大市成交縮水，8月日均成交縮至922億元，按月少15%。
割柑人
曾任財經記者、編輯，在本港報章撰寫財經專欄逾十年
www.fb.com/hkstockpicker
本欄逢周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com