【平民投資教室】錢俊：科技股反彈可走到幾遠
平民投資教室
日期：2023-01-17
更新時間：10:14:50
上年港美股大跌市，科技股成元凶。今年開局迎來反彈。科技股能否彈得更多？
好多評論員歸咎加息為拖累科技股嘅跌市主因。由於息口向上，大行用嚟對公司作估值嘅折現率（discou
nt rate）上升令科技股估值下跌。簡單嚟講，即係投資者覺得用錢造定存獲利愈來愈容易，就唔會冒高風險去買波動性高嘅股票，由其是投資科技股喺放眼未來先賺到嘅錢，不如依家先做定存收高息好過。
然而上述解釋只留於理論。股票總回報包括三個元素。第一係股息回報。由於科技股大多雖然用好多錢去開發業務同科研，就算有派息都唔方派得多，呢部份嘅回報幾可忽略。第二就係公司盈利。若果公司賺到錢，甚至超過市場預期，加息都唔會阻到佢嘅升勢。相比其他成熟行業，近年科技股盈利往往以雙位數百份比增長，都解釋過去點解嚇嚇都係科技股成為股王。
第三係估值水平變化，即會否喺盈利不變但股價仍然上升而令市盈率（PE Ratio）上升。呢方面比較關乎投資者情緒、以及對行業、市況嘅憧憬。
盈利方面，科技股會否有突破？國內不再清零，消費有望爆發，經濟活動恢復，企業更願意做多啲生意，國內科技股可能受惠消費者更加疏爽。然而美國因通脹高企，經濟衰退臨近，市民開始節流，比如取消訂閱串流平台，都可能影響業績。
估值水平方面，國內對科技監管嘅措施有所收斂，螞蟻金服有望重啟上市，都加強國內以及國際投資者對科技股嘅信心，呢部份都有機會提高回報。但美國加息陰霾、高通脹及潛在衰退等因素下，投資者難以全投信任一票。
總括而言，美國加息已近尾聲，科技股已過最壞時刻，但似乎中資股比較接受更好時刻。投資者都唔係傻嘅，上兩周港股跑嬴美股已經說明投資者已先搶飲頭啖湯。
3072：買重中美互聯網
香港上市嘅科技股ETF中，近期表現比較突出嘅有日興資產管理環球互聯網ETF（HKG:3072）。年初至今已彈16%。以現時基金價格計，唔洗1000蚊仍可買一手，管理費約為0.9%。
基金投資全球上市嘅公司，美中科技股比例大概為六四比，亦包少量其他國家嘅股票，與錢俊以中美股做膽嘅投資風格不謀而合。另外基金比較著重科網股，包括Google母公司Alphabet、阿里巴巴、Netflix、騰訊等。互聯網與直接零售、以及互動媒體與服務兩個板塊已佔成份超過七成。
與喺港美上市ETF比較，如恆生科指相關嘅ETF只投資香港上市嘅科技股，3072喺投資地域分散程度上較好；而喺板塊方面剛較為集中，因為缺乏硬件股好似小米、台積電、Tesla等。適合與否還看自己對地域或細分板塊嘅睇法，又或者可以另外買一啲環球半導體或硬件ETF作平衡。
想聽其他投資Topic？話我知：chinjun.column@gmail.com
FB: chinjun.etf
IG: chinjun.column
以上觀點僅為個人分析，並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com