2023年開局計算，恒指升9.7%，納指則升8.6%，港股仍然升得較多，不過美股升幅則係接近農曆年出現，美股原來都會派利是。
本欄喺上年11月9日寫「如何迎接2023年美股大反彈？」當時股價為10528點，最新升至11362點，升7.9%。
過去一星期，納指一星期升2.57%，相對恒指
假期前一周升1.41%，美股終於跑贏港股。2023年開局計算，恒指升9.7%，納指則升8.6%，港股仍然升得較多，不過美股升幅則係接近農曆年出現，美股原來都會派利是。
舊年11月亦寫過，港股初段會升得快過美股，但係最終美股都係會跑贏港股，現時嘅走勢都吻合。美股反彈，其中一個圖表派學說係標普已經突破今年1月以來嘅降軌。當然，圖表只係反映現實，而唔係作出解釋。如果要原因，用疫情做比喻，就係出現免疫。現時中招嘅人除咗有公佈嘅之外，冇公佈嘅肯定更加天文數字，但點解正常共存國家會當冇事，因為大家一早中曬招，已經有免疫。
同樣道理，美股2022年過去一年飽受加息及其預期影響，要中招領嘢嘅都領哂，仲留喺市場嘅都已對跌市麻目曬，即係有抗體，體會到跌係正常，升就係賺，心態一變，自然唔會咁易甩貨。
更重要原因，只係計Big Techs，成年由Neflix（NFTX）及Meta（META）劈價開序幕，到最後嘅蘋果（AAPL）及Tesla（TSLA）結尾，最嚴重嘅Tesla，係喺標普11月有反彈後，12月連同Twitter、賣股及銷量差過預期一同出消息先令股價接近100美元見底。成個大局計，就係科技企業太多好倉，2022年就係洗倉一年，逼令持貨唔穩嘅人嘔曬啲貨出嚟，包括孖展客及期權客，然後先至正常發展。現時要打嘅都打曬，倒轉越升越睇淡，反而成為交易對手。
港股離破頂仍很遠
至於點解由始至終對港股都不為所動，只係睇好美股，因為本欄認為投資個場係緊要過隻股，港股過去兩個月雖然好勁，有時網上會見到「東升西降」言論，但宏觀睇，美股過去十年升幅唔在講；「人間地獄」英國嘅富時指數亦都升至7875點，接近2018年7903點高位；「港人鄉下」日本呢啲鄉下地方，日經指數2021年已經突破30年高位。恒指同破頂爭幾遠大家都知，反向當然可以博港股成為下一個土耳其（BIST 100指數舊年升175%，港股今年亦具備去年土耳其嘅特質，有機會再講），但係有咁嘅點數嘅往績，升幅好大機會被其他財技消化，落得注應該先睇過去股價點樣對待股東，覺得光速餐買難受好正其實都冇所謂。
最後，農曆年正月喺度同大家拜個年。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com