【平民投資教室】錢俊：如何對沖銀行股
平民投資教室
日期：2023-03-28
更新時間：09:00:36
2023年第一季話咁快又就嚟完，原本季初一片歡騰，諗住今年可以跑嬴上年，突然又殺出銀行危機呢隻黑天鵝。今次全球跌市風眼嘅銀行股固然當災。唔單止美國銀行股，連香港散戶愛股滙控都難
逃一劫。股價自年初到而家已跌12%，連阿仔恆生銀行都跌12%，齊齊跑輸恆指。渣打更大跌22%。
雖然如此，正如上次講，今次風暴似乎大致受控，港股美股上周都大致返到一個月前危機爆發前嘅水平。既然銀行股至今仍然低水，到底乜嘢板塊升令整體市場未有受太大負面因素影響？持有好多滙控嘅散戶投資者可否從中睇到買乜嘢嚟對沖一嚇？
上周都提及過，地區及板塊之間嘅輪換或會出現，喺風眼以外嘅科技股及中資股或會重新受惠。數字或者都反映到—美股納指一個月內升咗3%，恆生科指更升咗4%。
另一個受惠嘅竟然係加密貨幣。之前個個驚FTX爆煲，虛擬銀包入面嘅crypto會血本無歸。但今次危機之後，有投資者或者發覺原來放喺銀行都係一樣咁危險。以比特幣為例，一個月已升18%。
當然都未必個個仲對加密貨幣有信心，另一受惠資產就係黃金。低風險投資者始終都係情投實貨。金價一個月升咗9%，連帶一啲金礦公司股價都受寵。
FAZ：反向金融ETF
如果真係想直接對沖銀行股，除咗買個別股份嘅窩輪或期權外，香港市場似乎選擇唔多。放眼美國市場，就有反向兼槓桿嘅銀行股ETF，包括Direxion Daily Financial Bear 3X Shares（US:FAZ）。顧名思義，基金造反向三倍，與Russell 1000 Financial Services Index指數對著幹。指數入面成份股包括「股神」巴菲特旗下巴郡（Berkshire Hathaway）、摩根大通、美國銀行、嘉信理財（Charles Schwab）等。
其中，Charles Schwab係第五大成份股，亦係今次銀行危機其中一個較嚴重嘅受害者，股價過去一個月跌超過30%。同期，FAZ嘅表現就喺反向兼槓桿加乘下升28%。
錢俊之前都有提過，槓桿反向ETF好處固然喺成本同方便程度上有好大優勢，但只係適合短線用嚟對沖跌市風險。由其反向ETF主要係以單日指數嘅走勢為基礎。如果你投資反向三倍，都係以每日回報三倍計算，當你長揸，假以時日，投資回報或會偏離相關指數累計表現嘅槓桿及反向倍數，造成好大追蹤誤差。加上管理費一向唔平，如FAZ就達1.1%。
想聽其他投資Topic？話我知：chinjun.column@gmail.com
FB: chinjun.etf
IG: chinjun.column
以上觀點僅為個人分析，並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com