日股除咗有「股神」加持，近排五大投資銀行——摩根士丹利、摩根大通、高盛、美銀、瑞銀亦唱好。
近年港股投資者好多轉炒美股，甚至轉炒日股，鬼咩，2018年1月29日，恒指高見33484，收32966，當日道指收26439，日經指數收23629；不足5年5個月之後，恒指昨日收19252，日
經收31913，道指隔晚收33573，期間港股累跌42%，美股累升27%，日股累升35%，叫港股情何以堪！日股自從2020年8月爆出「股神」畢菲特持有5隻日股——伊藤忠商事、三菱商事、三井物產、住友商事、丸紅各逾5%，上年、今年又加倉後，掀起跟炒之風；不過，喺日股升、日圓跌之下，買日股有冇著數？
美股外幣即時報價 多國新聞任睇
今年以嚟，日圓兌美元滙價累跌近6%；另一方面，日經指數累升22.3%，東證指數累升16.6%，兩者都已創出33年新高。值得注意嘅係，日股嘅升勢，某程度上建基於滙價下跌有利出口，推動日本企業盈利轉好，尤其係擁有大量海外業務嘅日本跨國公司。對外國股票投資者嚟講，日圓貶值可刺激企業盈利，而日圓升值則可改善價格表現。
獲股神加持 兼投行唱好
日股除咗有「股神」加持，近排五大投資銀行——摩根士丹利、摩根大通、高盛、美銀、瑞銀亦唱好。大摩認為，日股喺亞洲最有潛力；摩通認為，日股今輪反彈係可持續嘅，日本經濟正在擺脫通縮，向適度通脹過渡；高盛認為，海外投資者對日股嘅倉位仍然偏低，日股仍有上升空間；美銀認為，若日股牛市重臨，日經指數可望升至33500；瑞銀認為，日本今年潛在嘅政策轉變，有望帶動日股估值上調。
日股今輪升勢，有兩個因素支持：①經濟疫後復甦；②國際資金流入。據東京證券交易所數據，海外投資者連續9周凈買入日股現貨，6年嚟首見，期間凈買入額逾4萬億日圓。日股長遠嚟講，亦有兩個因素支持：①東京證交所敦促企業提高股本回報率（ROE），企業估值有望提升；②大約50%成分股股價低於帳面值及／或資產負債表上持淨現金，估值將被重新重視。當有大量資金流入日股，股價升幅可望大過滙價跌幅，就算日圓跌蝕滙水，仍除笨有精。
華夏日股ETF 有對沖滙率
當然，日股亦有風險，主要係日本央行或將放棄孳息曲線控制（YCC）政策。日本央行4月換屆後，未如市場預期提前取消極度寬鬆嘅貨幣政策——孳息曲線控制，但日本通脹開始上升，目前核心CPI處於30年嚟高位，據景順研究報告，倘若通脹持續上升，日本央行最快今秋被逼取消孳息曲線控制，當日本結束長達10年極度寬鬆嘅貨幣政策並回歸正常化，過渡期間，股市初期將會受壓，但未來仍然向好。
投資日股，最簡單就係買日股基金。本港都有日股ETF，但早幾年價值日本ETF（3084）同領航富時日本ETF（3126）相繼除牌，只剩一隻華夏日股對沖ETF（3160），係追蹤MSCI日股指數，另會透過期貨合約去對沖日圓滙價嘅跌幅，盡量避免賺股蝕滙。該ETF最大持股，包括豐田汽車、索尼等，亦有齊「股神」5隻愛股。該ETF年初至今累升21.6%，但要注意，該ETF成交較少，買賣差價或會較大。
此外，亦可考慮美國上市嘅日股ETF，例如iShares MSCI日本ETF（美︰EWJ）、iShares MSCI日本小型股ETF（美︰SCJ），今年以嚟，前者累升15.8%，後者累升7.2%；不過，由於冇做滙率對沖，回報少過華夏日股對沖ETF嘅21.6%，升幅亦低過日經指數嘅22.3%、東證指數嘅16.6%。
割柑人
www.fb.com/hkstockpicker
本欄逢周四刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com