【平民投資教室】錢俊：合成ETF非洪水猛獸
平民投資教室
日期：2023-07-25
更新時間：11:43:34
好多人都知ETF以追蹤指數為主，至於追蹤指數嘅方式，好多都係持實貨買入指數嘅股票及根據成分股比例買入，亦有以合成ETF（Synthetic ETF）嚟複製指數。
所謂合成
ETF，即係用非實貨方式，透過買賣金融衍生工具或掉期合約追蹤指數或商品表現。之前錢俊介紹過原油同碳排放權ETF都屬於此類別。好多人覺得合成ETF係高風險嘅洪水猛獸，甚至港交所要求所有合成ETF需要喺其中英文簡稱開首附加「X」號標記。
主要原因係合成ETF面對交易對手風險。由於金融衍生工具或掉期主要會同交易對家對賭，若對家或衍生工具發行人違約，ETF就有機會蒙受重大損失甚至清零。但其實呢啲通常係一啲罕見嘅情況，例如市況極度波動到金融海嘯程度先會出現。
事實上合成ETF都有其好處。比如管理費可能有優勢。相比實貨ETF，合成ETF只需持貨就可以達到追蹤目標，但實貨ETF或需不斷買賣以維持指數成份股比例。另外合成ETF或有較低追蹤誤差，因為同樣合成ETF只需持貨就可以達到追蹤目標，但實貨可能喺買賣股票時遇到流動性不足情況而蝕買賣差價。
而且合成ETF理論上仲可以追蹤任何股票以外嘅資產，因為衍生工具或掉期可涉足商品及虛擬貨幣等投資領域，俾投資者更多唔同選擇。
3020：納指以外嘅美股選擇
投資者買美股指數，主要係科技股主導嘅納斯達克指數，同標準普爾500指數，後者對想平衡投資組合唔同板塊嘅投資者較為理想。然而香港自從Vanguard領航基金退出香港市場後就再無標指ETF，要過美國市場先買到標指ETF。
若果唔想走去美股市場買，香港上市有Xtrackers MSCI 美國掉期 UCITS ETF（HKG:3020）。呢隻基金正正就係合成ETF。優勢之一固然係香港上市，用港元交易，唔洗唱美金同去開美股戶口。另外係管理費為0.15%，喺一眾香港上市ETF嚟講算平，如另一隻美股華夏納指ETF（HKG:3086）都要0.3%。而且追蹤嘅指數係按淨股息再投資後嘅總回報計算，因此基金雖然唔派息，但會係股價上反映返派息回報，因此慳埋派息嘅稅項同手續費。
另外就係基金喺行業分散性方面做得唔錯，資訊科技、金融、醫療三個板塊各佔基金成份18至23%不等。相比納指超過一半都係科技股。而且3020表現都唔差，年初至今升20%，與標指看齊。
然而缺點當然係要面對合成ETF嘅交易對手風險。而且入場費一手超過15,000蚊港幣，想細細地玩幾手唔容易。
想聽其他投資Topic？話我知：chinjun.column@gmail.com
FB: chinjun.etf
IG: chinjun.column
以上觀點僅為個人分析，並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com