平民投資教室 - 錢俊 2023年9月13日
【平民投資教室】錢俊：極端天氣受惠板塊
平民投資教室
日期：2023-09-13
更新時間：08:23:31
相比港股恆指喺萬八至二萬點浮沉，呢兩個星期大家應該都俾風災雨災折騰。「全球暖化」日漸被「氣候變化」同「極端天氣」等詞語取代。市況波動有得買put同沽空對沖，極端天氣又有無得對沖？
洪水、地震或其他極端天氣事件對建築物、物資及設備造成的物理損壞，造成高昂的代價，同時都導致生產停止或員工無法返工，擾亂業務和供應鏈並造成商業損失。用呢個角度諗，可以考慮投資擁有幫助改造現有建築物或加固現有能源基礎設施嘅公司，或者有助復修及加強建築基建服務嘅公司。
此外，隨著能源需求轉向低碳，石油、天然氣及煤炭生產商等公司未來面臨被放棄風險。反而可再生能源、電動汽車、電池存儲、氫能等新能源相關就受惠。 隨著世界轉向碳密集度較低的能源，這些行業可能會受惠於各國政策支持增加和需求增長。
能源以外嘅資源同時因氣候變化而可能變得稀缺。飲用水短缺、食品供應過度緊張等可能令公司同消費者造成高昂成本。比如受熱浪及乾旱影響嘅地區，農業生產受損，亦可能令全球相關商品價格急升。因此又可以睇嚇支持善用自然資源、彈性基礎設施、糧食和水安全以及可持續農業嘅公司。
FIW：買水保平安
香港經歷大雨一場，好多人聞水都怕怕。但近年因為對氣候變化嘅關注增加，以及ESG投資興起，多咗一啲水資源相關嘅投資主題。First Trust Water ETF（US:FIW）就係一個例子。基金追蹤ISE Clean Edge Water Index並投資入面嘅股票，包括咗大部分收入來自飲用水和廢水處理行業的公司。
雖然就咁睇投資水好似喺一項奇怪嘅投資，但其實當中包括增長同穩定兩個好處。 當香港政府要解決水災同渠務問題時，隨著發展中國家人口不斷增長，清潔安全嘅飲用水將成為呢啲國家促進和保護人類生命嘅首要任務之一，政府喺發展呢啲行業方面提供更多誘因，包括稅務優惠及財務支援等，因此造就呢啲公司有發為空間。
FIW大部分資產投資美國公司，其中大多數係中小型公司。年管理費約0.5%。對於嗰啲想投資人口增長帶嚟優勢嘅投資者嚟講，固然有可取之處。而且好多呢啲公司都係基建相關公司，現金流穩定，亦有一定抗跌力。表現方面，年初至今升10%，都算見得嚇人。
想聽其他投資Topic？話我知：chinjun.column@gmail.com
FB: chinjun.etf
IG: chinjun.column
以上觀點僅為個人分析，並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com