11月突然間成為全球會議月份，除咗最唔重要嘅美國APEC會議之外，英國AI高峰會開始，到香
港國際金融領袖投資峰會同新加坡FinTech節。 (WPA Pool via Getty Images)
11月突然間成為全球會議月份，除咗最唔重要嘅美國APEC會議之外，英國AI高峰會開始，到香港國際金融領袖投資峰會同新加坡FinTech節，香港都有FinTech周，不過相對冇咁重頭戲。連場峰會，請到咩人嚟，就係面子所在。
下載Yahoo財經APP
美股外幣即時報價 多國新聞任睇
AI峰會選址見心思
英國AI高峰會，選址Bletchley，係二戰破解軍事密碼場地，被稱為現代電腦嘅趨形，電影「模仿遊戲」The Imitation Game就係講呢個故事，淨係呢個選址心思已經滿分。要扣分當然係美國、加會大、法國、德國呢啲盟友元首唔嚟改派代表嚟，本來應該扣分，但因為呢個係AI會議，總統重要性較低，但再睇名單：馬斯克、英偉達CEO黃仁勳、OpenAI、微軟（MSFT）、Google（GOOGL） 、Meta（META）、Amazon（AMZN）、Palatir（PLTR）、Arm（ARM）、三星都有派CEO嚟（部份係AI部門嘅CEO），關AI事嘅差唔多都有嚟，其實算幾齊腳。
金管局網站話「峰會將有多達 300 名來自全球頂尖金融機構的負責人出席，當中包括超過 90 位集團董事長或行政總裁」，新加坡FinTech節同香港金融高峰會撞口撞面都係嗰啲金融機構，定位當然唔同，今年則冇上一年咁傳媒逐間數香港對新加坡幾比幾。
香港新加坡大家都係請嗰啲人，國際金融中心請國際金融人物嚟，用金融術語，只係符合預期，唔會令到市場有咩驚喜。 (NurPhoto via Getty Images)
今年「齊人」就算成功
至於點為成功，先講已搞完嘅英國，其實搞得成已達標，請到咁齊人已等同成功。因為眾所周知英國又窮又落後，時勢罕有地出到間劍橋公司Arm架構，都算左右世界晶片發展，但上市都揀美國上，證明倫敦連金融都出出哋事。但日落國一搖旗AI會竟然咁齊人，首相辛偉誠喺國際商界都算有面。
至於金融展，正如上面所講，香港新加坡大家都係請嗰啲人，國際金融中心請國際金融人物嚟，用金融術語，只係符合預期，唔會令到市場有咩驚喜。英國同新加坡都將AI人工智能同金融科技作為重頭戲，就知重點喺邊，而馬斯克講嘢多人聽，定某個投行高層講嘢多人聽，十年前可能投資銀行重要啲，今時今日梗係多間公司CEO馬斯克講嘢重要啲。
香港要贏，其實好簡單，就係有刁，香港金融嘅本質，就係開單。一個二個CEO嚟食完免費餐，返去公佈裁員計劃，重點炒香港員工，就係蝕本。舊年高峰會前後，國際銀行喺香港都有一輪裁員潮，有啲直頭成個部門連根拔起。今年如果香港金融管理局總裁余偉文等人挾到班大孖沙，上台演講高調話上年炒錯人，今年要請返突，喺香港投資多啲，開到單，咪算成功囉。
高明
IG
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com