金融High Tea 2012年6月13日
金融High Tea——追弱股
2012年6月13日
■昨日明顯見到市場有追弱股傾向，借住市傳廣東有銀行正籌備推出首套房貸有八折，甚至七折房貸利率優惠，內房股紛紛「起錨」。新華社
外圍炒西班牙獲救的消息熱潮燒退，美股杜指上日大跌142點，亞太區內股市齊齊唔掂，內地A股在全日在低位徘徊，上證綜指收市再度失守2300點。但港股唔係跌咁多，早上低開234點後，反覆向上收復失地，收市只跌81點，雖然成交少到只有416億，但懷疑有外資低位吸吓國貨，所以大市無乜暴跌。
西班牙銀行得到歐盟援助的利好消息消化得比想像中比預期快得多，除咗希臘國會重選臨近因素外，西班牙銀行業的惡劣狀況，又好難令市場產生任何憧憬。
歐洲用水槍救火
瑞信昨日發佈對西班牙銀行進行壓力測試的結果。顯示西班牙銀行業總資金缺口共1550億歐羅。另外，還有約940億歐羅的非房地產貸款可能會變成壞帳。即係話，要求西班牙銀行業，資金起碼要2500億歐羅。歐盟最多只向西班牙提供1000億歐羅救助，水槍救火也。
拯救西班牙銀行行動雖然撐唔起個市，但一定程度紓緩了資金壓力。所以大市暫時不至於會大跌，而希臘國會重選憂慮升溫，預計投資者唔敢有大動作，大市呢兩日會繼續在無乜成交的情況下唔上唔落。
雖然大市昨日最八卦話題係任總無端端出嚟講聯匯「優化」，似乎想出招搞嘢，但對個市影響唔大，焦點仲係阿爺放水之上。中環茶友話，阿爺上周五減息，擺明係連串減息潮開始，上周六公佈的出口數字唔差，令老外開始注意中國經濟在阿爺接連出招後，可能正出現轉角市，所以手上貨少的要補番少少貨，雖然時近6月半年結，呢啲時候真係唔係適合買貨的時候，因為一買錯半年結時即衰，但為怕國貨轉勢轉得太快，倉底貨太少者都要焗住追番少少。
昨日所見部份紅色大股都逆市微升，如中移動(941)微升0.2％，成交咗9.2億元，平保(2318)亦升0.2％成交6.1億元。而內銀巨股雖跌，如工行(1398)、建行(939)雖然略跌，但各自有15億成交，呢啲市夠膽買內銀大股的都似係基金唔係散戶囉。
內房股博佢變綠城
我就話雖然見到有基金補貨，都唔等如後市一定升，因為希臘在周日選舉，結果如何似買大細，好難估，外圍插港股都要跌，但若外資對紅色股的看法改觀，香港短程的走勢會比外圍強番少少。
昨日明顯見到市場有追弱股的傾向，借住市傳廣東有銀行正籌備推出首套房貸有八折，甚至七折房貸利率優惠，內房股紛紛「起錨」，成為明顯受惠類別，較大隻的如恒大(3333)，5月賣樓情況理想，加上有上海崇明島大盤將開售，昨日炒高4％。中小型內房股玩得更狼，中型股如恒盛(845)大升15.9％，小型股如盛高置地(337)都升11％。呢啲股份擺明係追落後，好似恒盛，去年7月高位仲有2.7元，然後大跌，而家大升完都係得1.24元，都只係在地底彈咗一下而已。
早前綠城(3900)搵到九倉(004)入股，一日大升3成以上，資金四圍尋寶，買吓二三線內房股，當然想博有第二隻綠城。套用股神巴菲特的比喻，有啲股份跌得多，好似煙頭咁，你畀好少錢執起去，吸到一啖就回本，吸幾啖就有賺(雖然股神用咁邏輯買巴郡隻殼中咗招)，而家買跌得殘的內房股，就如執煙頭吸，睇你好唔好彩啦。
陸羽仁
上一頁 下一頁
金融High Tea 舊文