中環在線：六月初一十五長實、和黃擇吉講業績 - 李華華
設計對白
首富李嘉誠搶閘，旗下電能(006)聽日(19日)為藍籌股中期業績期揭開序幕，同日仲有長建(1038)同長江生命科技(775)，重頭嘅長實(001)、和黃(013)就8月2號公佈業績。細心啲睇，呢兩日分別係舊曆六月初一同十五，係咪擇過日㗎？
麥玲玲：配老闆命格
華華時有聽聞，上市公司老闆喜歡搵人擇日上市或者公佈業績，前者同大肚婆擇日開刀生仔差唔多，擇日公佈業績聽落就好奇怪，盤數係好係醜都係要公佈，擇日有乜用呢？唔通擇個吉日公佈，即使盤數樣衰，睇落都會靚仔啲咩？
咦，風水師麥玲玲話真係咁喎！佢會因應上市公司老闆命格，揀個旺佢嘅吉日畀間公司公佈業績，如果盤數好差就希望市場反應冇咁差，若然盤數靚仔就希望做到市場更加受落嘅效果。有啲老闆又會有個人偏愛，例如鍾意初一辦大事。
華華對於上市公司擇日公佈業績依然感到匪夷所思，正如有人走去買教你如何發達嘅書，發達嘅只係作者，未必係讀者。上市公司擇日公佈業績，首先有錢落袋嘅咪就係位風水師囉。
一向有「精明眼」嘅誠哥係咪擇日公佈業績，還是咁啱揀中初一同十五兩日？其實最緊要啲數開出嚟唔好令股東媽媽聲囉！
李華華
mailto:LiWaWa@AppleDaily.com
華華唔多識睇通勝，淨係知初一同十五同事要食齋。
上一則: 穩中求進人大：穩增長先穀投資
下一則: 中環在線：會計界梁繼昌搞㷫大暑 - 李華華
中環在線 - 李華華 舊文