金融High Tea 2012年7月18日
金融High Tea——壓樓價變推樓價？
2012年7月18日
■長實去貨更快手，將軍澳「峻瀅」呢兩個月已售出逾1300伙， 平均呎價5800元，套現逾60億元。
昨日個市相當玩嘢，因為大市急抽，絕大部份升幅是在9點半現貨開市前完成，大約在9點20分開始，期指在10分鐘內由19100點急抽到上19400點，就係咁升咗近300點，升咗大半現貨才開市，結果恒指全日在高位徘徊，唔肯跌番落來，收19455點，升333點，升幅1.8％，成交 428億，成交叫做升番小小。
近排港股一直被內地股市拖住後腿，昨日威番次，帶番A股上，上證綜指升0.6％，收2161點。成個亞洲都係香港升得最多，日本只係升0.3％，南韓升0.2％，港股威盡亞洲，值得留意。
夾住淡倉係咁劏
中環茶友話，昨日升市特別的地方係期指實現咗大部份升幅，所以係期指推高大市，唔係因為某種股份特別好推升大市。有可能係有外資睇好港股落大盤買期指，等候中美政府推寬鬆政策；亦有可能是大戶挾高大市殺淡倉，睇昨日個市上咗高位唔肯回頭，買方都相當強悍，擺出一副唔夾死淡倉唔收科的架勢。
雖然話期指帶起大市，但點都要睇睇邊啲股升多啲，昨日升得多的股份包括本地地產股、石油股和內地保險股。中海油(883)升3％，國壽、平保(2318)升3.5％，相對跌咗好多的內銀股普遍只有1％多一點的升幅，升得較溫和。呢啲股升代表市場認為中國經濟放慢觸發阿爺放水，未來油價會升，股市會升，油股和投資股市的保險股都受惠。
地產股亦相當巴閉，長實(001)大升4％，信置(083)、恒隆(101)、九倉(004)升3％，不止隻隻跑贏大市，妙就妙在升得最多的有唐營的長實，有梁營的恒隆，似乎唔分乜營都可以升。長實收100.8元，再次升破百元大關變番紅底股。
貨如輪轉密密食
地產股咁升法，照計都可以從特首CY的立法會答問中找到少少答案，佢為咗頂住政治壓力，將答問會變成微型《施政報告》發佈會，大力派糖，收買民心，其中一味是每年推出5000個免補地價買二手居屋的名額，畀中獎市民唔使補地價買市場上的居屋，換言之每年有5000個居屋業主可以賣樓套現，當中可能有相當部份會沽舊樓買私人新樓改變居住環境。消息一出，首先係二手居屋加價，其次係惹來明益發展商之譏，指政府每年送幾千個新客畀發展商。
我估除了居屋免補地價的刺激外，新政府咁弱，睇佢都搞唔出乜嘢好勁的打擊樓價措施，話增加供應又有排未有貨出，即時措施反而係搞埋居屋免補地價，豈不是由怕CY打壓樓價，變成佢刺激樓價？你睇前一陣子二手樓市無晒成交，最近又開始郁番，顯示買家信心返晒來。
如今發展商更不惜貨，大手散貨。過去一直貼市開盤的長實去貨更快手，單計佢的將軍澳樓盤「峻瀅」呢兩個月已售出逾1300伙，平均呎價5800元，套現逾60億元，1300伙唔係小數目。過去惜貨如金的新世界(017)加快去貨速度，今年初至今總銷售額達86億元，主要為住宅，其餘為車位及商場。
政府增加推地，早前北角地皮都唔係以天價成交，麵粉價變得合理，即使將麵包貼市啲去賣，都有合理利潤，咁會唔會政府愈推地，發展商愈賺得多？佢地貨如輪轉，大力沽完又投地起過樓。我早前都話過地產股可以炒一轉，睇怕還有偷雞再炒高啲空間。
陸羽仁
上一頁 下一頁
金融High Tea 舊文