中環在線：輪後名嘴倫奧心水 - 李華華
珠珠睇奧運跳水至冧
倫敦奧運今日開幕喇！相比當年京奧日日俾《We are Ready》洗腦，倫奧在港宣傳靜過英女皇登基鑽禧紀念。噚日華華同財圈中人八吓點迎接奧運，大家話得閒會睇，即係有時間先睇，熱情固然比唔上08年京奧，而且仲慘情過幾個月前歐國盃。不過有啲永恆嘅熱門項目，都博到財圈男女一絲關注嘅。
珠珠捧跳水項目場
法巴輪後趙海珠話，同事之間嘅熱烈程度，只限噚日朝輕輕提過女子足球隊已經開賽，至於佢自己有時間就會睇，「可能都係睇遊水同跳水，都係當娛樂節目睇，冇特別追捧嘅運動員。」
話對歐國盃興趣更大嘅豐盛金融資產管理董事黃國英，就未必會睇開幕式，反而會留意田徑、籃球等心水項目，「我本身睇開NBA所以會睇籃球，主要睇吓邊隊能夠打贏美國隊，睇吓西班牙能唔能夠鋤強扶弱。」耀才市務總監「大隻佬」郭思治就鍾意睇田徑同自由體操，「呢啲項目我永遠做唔到，好似有好多迴旋嘅單槓雙槓，同100公尺。」捧嘅當然係中國隊啦。
郭思治話，未聽聞有分析員朋友遠赴倫敦睇奧運。黃國英嘆奧運熱潮都係要靠電視台造勢，前排播映權單嘢搞到七國咁亂，令到大家興致銳減。
至於大家一致話會睇嘅運動員係「欄王」劉翔，當年飲恨京奧，大家寄望佢為中國人爭光。
大行如高盛亦有出報告，用經濟分析預測金牌三甲，分別係美國、中國同英國，高盛估中國攞到37面金牌，當然包括劉翔110米欄啦！
李華華
mailto:LiWaWa@AppleDaily.com
上一則: 蒙牛新總裁推「維新」措施
下一則: 中環在線：美股走勢驚現複製 - 李華華
中環在線 - 李華華 舊文