陸羽仁 BLOG 2012年7月27日
央行牌
2012/7/27 上午 09:37:07
網誌分類: 經濟
期待已久的中央銀行牌終於打出來。西班牙及意大利的國債息已經去到「水浸眼眉」的高危水平，仲唔撲火，真係隨時爆大鑊死人，一向力主財困國家要自己搞掂，唔好太依賴外援的歐洲央行行長德拉吉，昨日首次態度明確地表示:「歐洲央行將竭盡所能做所有需要估的事去保全歐元，你相信我，這將會足夠的。」。
德拉吉只是打一張空頭「開口牌」，沒有講具體內容，就好似一支強心針，令投資者興奮莫名，歐美股市及大宗商品市場狂彈，漲幅驚人。點解? 因為這是大家預估的必然結局，歐洲要爆煲，難道央行不出手，所有淡友都只係怕呢張央行牌。早兩日美國華爾街日報有文章估計，美國聯儲局快則8月初，遲則9月中，都要決定出手救市，而家儲局諸公正研究方案，除了推出QE3之外，還可考慮的行動包括調低銀行存錢在央行的利息，逼佢地借錢出街; 將低期預估由目前的至2014年，推遲至2015年等等。
但聯儲局未出手，歐洲央行已提前出口術，到底歐洲央行主席德拉吉有什麼絕招可出? 估計包括:第一，極其進取的在二手市場購買政府債券方案，目前歐洲央行不可以直接主權國債務，但有很多方法可以繞過此規定。德拉吉暗示，主權國債息高企損害歐洲央行的貨幣政策，他有權去拉低債息。
第二，再度提供超低息貸款予銀行(已進行了兩輪)。第三，讓永久的歐洲穩定機制(ECM)取得銀行牌照，它因此可以向歐洲央行提款救市，即是變相透過這方法無限量印銀紙救市，而不是ECM每次要救市都要成員國承諾出資。第四，亦是最後的火箭炮，就是唔搞咁多花招，直接由歐洲央行印錢救市。招數有好多，問題是歐元區國家有無政治意願出招，不過燒到西班牙和意大利，可能唔出招都唔得。
歐股聞德拉吉之言，平均大彈2.5%，法國德國分別漲4%及2.8%，正主兒西班牙及意大利股市自然更勁，勁抽6%及5.6%，市場預期當地銀行業有救，因此彈得也最勁，意大利裕信銀行及西班牙桑坦德銀行飆升超過9%。
美股方面，歐洲形勢一片樂觀，加上開市前公布的首次申領失業救濟人數及耐用品訂單數據都好過市場預期，美股朝早表現亦好神勇，杜指開市抽高255點或2%，但回順之後，就無力再上，橫行到收市。杜指收市報12888點，升212點比。杜指急抽一輪就無力再上，原因係稍後公布的二手房簽銷指數未能配合。市場預期6月的二手房簽銷指數較上月增長0.9%，但結果係下跌1.4%，而5月份係大漲5.9%。房地產數據唔靚仔，壓住大市升勢。港股又玩下反彈先。
陸羽仁
回應(6) 我想回應
陸羽仁 BLOG 舊文