金融High Tea 2012年7月27日
金融High Tea——鮮花係會謝
2012年7月27日
■澳門本月博彩收入數據疲弱，全月料按年跌7%至約255億澳門元，為2010年有記錄以來首度按年倒退。
港股先跌後穩，經過歐債「牙痛」一輪後，港股似乎初步回穩，不過，唔同板塊輪流跌的情況無變，昨日就輪到濠賭股當衰，幾隻重量級股份都滑落，比較明顯係恒指成份股的金沙中國(1928)，若然睇圖，一個下降通道已在形成，令人覺得一個完美下墮將會出現。
濠賭股唔靚仔，不過自今日始，新一輪回落，係借住市場有消息話，澳門本月博彩收入數據疲弱，全月料按年跌7%至約255億澳門元，為2010年有記錄以來首度按年倒退，令濠賭股昨日已偷步跌，今日繼續下挫，第二季收入淨額按年跌四成的金沙中國，跌勢最猛，收市稍好報21.15元，跌近半成，其他濠賭股都紛紛腳軟。
賣花人大力沽濠賭股
早兩個月，陸羽仁已開始唔係咁睇好濠賭股，陳潔靈有首金曲歌詞話「知否明天一到花就會謝」，世上的事物，無話永遠都咁燦爛，尤其係股市，因為股市永遠都係炒預期，當一間公司或一個行業表現出色，市場就即係作出反映，調高對佢的預期，同時反映在股價身上，令股價抽升，咁就算幾好的公司，最後都無辦法應付到無窮期望的需索，最後就算唔散咗，至少都要有明顯的調整，等市場期望變番實際啲。
好似濠賭股，過去兩年跑贏大市，但今年頭開市，雖然大市升得唔錯，但呢類股份升幅已開始放緩，原因好簡單，因為去年澳門業務增長凌厲，基數咁大下，今年再有良好表現，市場都當預咗，但稍有失閃，股價就肯定無運行，故此醒目資金已開始減持呢類股份。
另一個睇到濠賭股弱勢的訊號，係五．一黃金周內地旅客增長放緩，六月份情況仲明顯，當時陸羽仁的「澳門朋友」已經話，賭廳生意受內地銀根緊影響，開始難做，呢個時候有股在手唔走，就已經錯過機會嘞，由為去年第四季，係澳門股開花開得最燦爛的時候，唔識揀花的散戶見到朵花咁靚，仲以為係好嘢，到咗今年首季，就係開到微露出疲態的時候，第二季鮮花已開始凋謝，大家都睇到，賣花人自然大力割價，有人肯買就會去貨。
對於濠賭股前景點睇，陸羽人唔敢話佢永無翻身之日，不過眼前嚟講，澳門還有大量新賭場新酒店在建中，投資者要留意是否愈起得多那一間，愈會中招？股海浮沉，除咗睇長遠，仲要睇眼前，最緊要唔好俾大浪愈沖離岸愈遠。除了濠賭股，恒指朝早表現唔錯，但去到18900點已無力再上，跟A股下滑，直到內地收市後至反彈。收市倒升15點，報18893點，成交434億元。
內房股仲係無運行
中資金融股繼續跑輸大市。恒生中國H股金融行業指數逆市跌0.24%。內銀股個別發展，中行(3988)升0.7%，建行(939)跌0.8%。
阿爺放鬆銀根，地產成交量回暖、開發商加價、又有地王出現、唔少地方政府為咗提高銷售，猛搞「小動作」，觸動到阿爺怕樓市起泡的神經。最近不斷加強樓市「不放鬆」的市訊號之餘，更派出官員到多個省市督查。總之係「一彈即打」。
有分析指出，「房價出現類似2009年的迅速大幅反彈，從而引發更嚴厲的調控的可能性唔高，但房地產的調控嚴厲程度已經遠遠高於市場預期。地產政策負面預期的增強對壓抑投資者的短期情緒。」地產股易跌難升，成為淡友的狙擊對象，短期內都係無乜運行。
陸羽仁
上一頁 下一頁
金融High Tea 舊文