金融High Tea 2012年7月25日
金融High Tea——小心內房腳軟
2012年7月25日
■滙控昨跌1.7%，收報62.05元。
打完十號風球，尚幸無乜死傷，反而股市持續向下仲死得人多。昨日打完風得半日市，仍然無忽好肉，半日交易都跌150點，得番18903點，連19000點大關都失守，走勢穿位向下，十分肉酸。
近期港股玩向下，昨日內地股市反彈0.2％香港都唔跟，相當我行我素。昨日單係隊住匯控(005)和中海洋油(883)落來，兩隻股加埋已拖低大市84點，佔咗大市近六成跌幅。匯控跌1.7％，收62.05元，又係炒佢涉及美國洗黑錢的指控，雖然匯控行政總裁歐智華因此事道歉咗三次，但係對公司財務係唔係有咁大影響，表面看唔太似。雖知匯控有祖家英國照住，出事有英國代為同美國講數，恐怕打吓佢手板可以走啦，唔至於要切隻手交差啩。
中海油收購照捱沽
中海油下跌就因為有大買賣，佢斥資1,172億元收購加拿大能源公司Nexen，並承擔其336億元債務，雖然作價較Nexen市價高六成，但大行看法普偏唔差，因為收購後可以增加中海油石油儲量三成，但證券商未有調高中海油目標價，結果中海油收市跌4%，收14.82元，為表現最差的藍籌。係人都知阿爺要收購石油資源，以補充中國長線發展的需要，我哋只怕中海油因為政治任務亂出高價去收購，但從證券商的報告看，市場對收購唔睇淡，對中海油長遠前景有利。在旺市時呢啲收購消息可以炒起，不過在目前這個時勢，花錢收購變成壞消息。
PMI止跌憧憬經濟回穩
內地的宏觀數據不壞，匯豐公佈7月匯豐製造業採購經理指數(PMI)初值為49.5，比6月的終值48.2高，亦創下5個月以來最高，雖然匯豐的PMI只是民間數字，又偏向中小企，但亦有一定參考價值。匯豐中國首席經濟學家屈宏斌認為，7月匯豐中國製造業PMI初值溫和回升到5個月以來的最高，表明前期的寬鬆措施開始產生效果，然而該數值仍然低於50的榮枯分界線，表明總需求仍然乏力，需要政策加大寬鬆力度以支持經濟增長和就業。而高盛經濟學家宋宇稱，匯豐7月中國PMI預覽指數反彈是一個積極訊號，反映下半年中國經濟有望溫和反彈。
阿爺放水開始對經濟有正面影響，匯豐PMI數字支持了內地股市，但唔知點解港股完全無反應，或者向下插的劇本未演完，所以對好消息無反應。
阿爺一放水，內地樓價又彈，已經引起領導敏感反應，據《上海證券報》報道，房地產貸款的潛在風險引起管理層高度關注，國務院將派出6個督查組分赴12個省份進行房地產市場督察，房地產貸款也在檢查之列。據說中國銀監會不會叫停房地產貸款，但會要求未來房地產融資嚴控風險，不排除有新規定出台。我話阿爺未去巡視已放定風，係出口術叫人唔好炒樓，講到明唔想樓價升。內房大股的股價比較強，近日略有回落都跌唔多，但要小心阿爺往後一邊放水，一邊出招控制樓市。
瑞信發表報告，話6月內地主要城市房價按月上升者大幅增加，令政策風險顯著增加；預計到9月或10月，內房股的風險回報情況將轉向負面，特別是到時中國經濟數據或已穩定下來。瑞信維持內房股「減持」評級。
我就話好多大國企都跌到七個一皮，巨型內房股相對處於高位，比值偏貴，要小心等大市反彈內房股炒多一浸後，就再出現較長的腳軟期。
陸羽仁
上一頁 下一頁
金融High Tea 舊文