金融High Tea 2012年7月26日
金融High Tea——大戶買嘢 愈買愈跌
2012年7月26日
■保利協鑫昨跌6.5％至1.15元。圖左三為主席朱共山。
恒指昨日先插後彈，好友淡友都玩死。恒指早段低見18710點，但在下午三點內地收市，而歐洲開市後，從低位急抽200點，收18877點，只係微跌25點。表面睇港股咁硬淨可以話係受歐羅反彈氣氛改善影響，有可能只是夾倉所致，期指跌穿19000點後，這兩日跟住隊的人不少，人人話睇18000點，跟沽者眾，大市最後見唔見18000點無人知。大戶趁跌市多人做淡倉之勢，夾高200、300點，又可以殺一「浸」淡倉。
跌市衰股表現慘淡，國美電器(493)發盈警，昨日勁插14.4%至0.65元，連市場預期的最低目標價都失守埋，市場已預期國美盈利會大幅倒退，結果係仲差過市場預期，要蝕本。多家大行隨即出報告睇淡。
環球股市淡靜，壞股固然跌，好股亦都跌到七個一皮，就出現好多收購事件，不少大公司趁機買嘢，例如中信證券以12.4億美元的收購專注亞洲業務的里昂證券，又例如中海油(883)以151億美元收購加拿大第十二大油企Nexen，都是千億巨額收購。.
誠哥公用事業買不停
今次輪到長和系再出招，長實(001)將聯同長江基建(1038)、電能實業(006)及李嘉誠基金會，斥資6.45億英鎊，即逾77.5億港元收購英國天然氣運輸Northern Gas Networks。雖然目標公司現在有虧損，但長江基建董事總經理甘慶林相信，虧損是根據英國會計制度計算帳目所致，若用國際財務制度計算，不存在虧損情況，佢相信長建等投資此項目的回報率可達到雙位數字。而長建及電能實業，在今次收購中各自承擔25億港元，收購完成後，長建負債比率由目前的7％上升至11％；電能實業負債比例稍升至36％，但兩家公司目前手頭現金，分別有80億及66億港元，收購不會對公司帶來財政壓力，兩公司的負債比例仍然偏低。
市況唔好公司收購後股價通常有壓力，昨日長和系亦一樣，長實跌0.9％，電能跌1.6％，不過淡市收購買平嘢，長線對公司有利。70幾億的收購，對長和系只是小菜一碟，相信佢地睇啱會繼續入市，特別是投資英國的公用事業生意。從咁多公司開始收購可見，睇長線價值，好多股票資產開始跌到相當便宜，真係大戶買嘢，愈買愈跌，因為佢哋只會在跌市出招買平貨，買完再跌，佢哋愈跌愈買得多。
保利協鑫跌到變型
現時呢啲市，好多大股都跌到好驚人，你要睇住股價做人，真係無覺好瞓，近排歐洲太陽能企業指控中國太陽能公司傾銷，中國太陽能巨企還擊反指控，搞到太陽能股大跌，巨股保利協鑫(3800)跌跌不休，昨日再跌6.5％至1.15元，呢家公司在多晶硅和晶片全球市場佔有率達三成以上，跌到只有178億市值，真係估佢跌都估唔到佢跌咁多。
我本來想話保利協鑫好抵，但中環茶友話，中歐美的太陽能巨企打大交，芬佬驚恐走貨，唔好話佢而家低，可以插到更低，而家叫散戶買，買完再跌，佢地吃咗眼前虧頂唔順點算？保利協鑫再插到0.5元又如何？聽完我都同意，暴跌中的股票，和暴升中的股票一樣，唔太理性，短期唔好同佢對抗，好多散戶食得鹹魚唔抵得口渴，睇股無耐性，都係少掂急跌股為妙。
陸羽仁
上一頁 下一頁
金融High Tea 舊文