金融High Tea 2012年7月5日
金融High Tea——遊客消費股「小寒冬」
2012年7月5日
■上周被過江龍造空公司狙擊的恒大地產繼續反彈，升3%至4.09元。圖中為主席許家印。
■周生生去年純利10.9億元，升44%。
7月港股唔可睇淡，而家只是處於抽升後整固的唞氣階段，睇好理由之一是港元近日非常強，顯示有資金流入，港元由5月低見7.770，反覆回升，到6月下旬升勢轉急，昨日造7.754，升到接近金管局的7.75強方保證，再升金管局隨時要入市干預咁話。港元強勢通常和股市走勢呈正相關，港元咁強，港股好難大插。
昨日支撐大市的主要係地產股。恒生地產分類指數升1.2%，跑贏大市。本地地產股以盈大地產(2917) 最勁，抽高逾一成至1.56元，信和(083)升3.3%至12.5元，長實(001)及恒基(012)齊漲。恒指最後以微跌25點收市，報19710點。成交縮減至458億元。內地A股反覆偏軟，尾市回穩，上證綜指跌2點至2227點。
恒大上演反狙擊好戲
英國《金融時報》報道，Vodafone與競爭對手和黃，正討論合併愛爾蘭的電訊基礎設施。有分析指共享網格若達成的協議，和黃可以大削通訊運作成本。和黃炒昨日升4%，突破70元，收70.6元。
多隻內房股表現不俗，當中以合景泰富(1813)及遠洋地產(3377)最好，升超過5.5%。上周被過江龍造空公司狙擊恒大地產(3333)繼續反彈，升3%至4.09元。有傳媒報道，恒大管理層今早現身灣仔警處，傳公司向警方商業調查科尋求協助，好戲繼續上演。
近日大市炒上落，不同行業環境對股價要特別留意，要小心本地零售業，剛公佈5月的數字好差，按年只上升8.8％，升幅創09年9月以來新低，當中珠寶首飾、鐘錶和名貴禮物的按年升幅只有3.1％，是03年開始有自由行以來最低，零售管理協會主席麥瑞瓊形容5月的數字「震驚」，而且目前未見底，只是開始驚。建銀國際證券研究部董事林樵基話，5月零售銷售數據疲弱，反映內地經濟放緩，影響內地客來港消費，預料第三季不會那麼容易扭轉，零售業將迎來「小寒冬」，到第四季才會好轉。
我早排已講過，聞到味從3、4月開始內地遊客的貴價消費退潮退得好快，如今終於在數字反映番出來，內地水緊，借錢畀人年息少少地收20厘，犀利啲50、60厘，我係內地豪客，與其花100萬買隻名錶保值，不如借水畀人生息，當然更多人係自己都水緊，自己借緊高利貸，那有心情花大錢消費。
珠寶股平得嚟有風險
特別要小心鐘錶珠寶股，尖沙咀、銅鑼灣舖租貴到死，廣東道、羅素街舖租100、200萬月租閒閒地，成本咁貴，生意一放慢，那上由賺轉蝕，而家生意跌舖租未跌，高檔零售商硬食。我早前話租貴人工要加快餐店難捱，有業內人士話，佢地情況未必好差，因為食材價見頂回落，可能消化到人工升幅，但快餐價錢仍在加，混亂中搞好的盈利可以上升。唔似高檔消費股生意下跌，但舖租成本無得跌，經營狀況惡化中，盈利可以急插。
好似隻周生生(116)現價15.58元，市盈率9.6倍，股價從1年高位32.1元回落超過一半，表面睇唔貴，但去年純利10.9億升44％，今年盈利會唔會倒退？倒退幾多？生意跌若成本結構彈性不足，例如租舖受租約困死，純利可以跌得好快。
陸羽仁
上一頁 下一頁
金融High Tea 舊文