投資的天空：個股走弱要留意 - 張士佳
大市舞上舞落，仍然在20000至20300點之間區間波動，綜合外圍及內地市況，指數表現算是不錯，但從個股走勢看，最近港股卻有一點外強中乾的味道。筆者喜歡以股份升跌比例觀察市況，其實上周後期開始，相比沉靜市況，下跌股份的比例都屬偏高。
反映投資者傾向
尤其昨日早上，當大市仍然上升時，下跌股份竟高出上升股份近300隻，好在下午內地股市倒升以及德、法兩國公佈的GDP勝預期，令不少個股重回，但大市升逾200點，升跌股票只係約五五之比。
早前市場流行醜股大翻身，但開始有已到水尾的迹象，近兩日炒上的不少是缺乏基本因素的細股，反而部份早前掃上的股份已接近打回原形。另外，早排盈警的威力似乎因市況強勁而減退，但這兩天其威力又加強番。有人話這視乎股價是否已反映盈利倒退，不過近日因盈警被洗倉的都係一些弱勢股，話之前無反映又似乎唔係好講得過去。當然，以上觀察只係一些用作參考的指標，單憑這些現象並不能全面分析市況。尤其衍生工具當道，大戶要踢上挾死啲熊仔並唔難，但個股表現唔多唔少都反映投資者的傾向，唔可以忽略。
至於組合方面，雖然信置(083)昨日逆市下跌，但暫時應只係急升後的整固階段，今天會維持升穿14元買入3萬股的指令。
筆者未持有上述股票
與曾卓鋒(寶來證券業務經理)聯合執筆(逢周三、五刊出)
作者：張士佳、曾卓鋒(寶來證券(香港)業務經理)
上一則: 青心直說：內銀理財小學雞 - 胡孟青
下一則: 外幣兌港元
投資的天空 - 張士佳 舊文