金融High Tea 2012年8月15日
金融High Tea——追落後炒衰股
2012年8月15日
大市應跌不跌，外圍偏軟，但昨日期指一開始就抽上百幾兩百點，界定咗香港係一個升市格局，雖然早段大市有回吐，但稍為穿一穿21000點就守住，最後不繼炒番上，收市升210點，升1％，恒指收20191點近期高位，而且成交上升至562億。上日跌市成交跌，昨日升市成交增，大市走勢偏強。
早上和經紀張打牙骹，佢問個市開市升乜？我話唔知升乜，但上日大市收在20000點大關附近，若內地個市跌，港股一跟跌好易插穿20000點大關，但大市一開就抽高200點，遠離20000點，即使跌起上來也有水位走棧，睇嚟大戶唔係幾想個市跌，後來大市走勢果然如此。
昨日有挾住大股頂起個市的味道，最大兩隻匯控(005)升1.2％，中移動(941)就公佈業績更升2.2％，其餘三大內銀股升幅好過大市，結果五隻股加埋已升近120點，超過大市半數升幅。
大市偏強，資金搵落後股炒，所以早兩日炒新地(016)或者渣打(2888)，都係類似概念，佢哋本來都係大股強股，因為種種原因，畀人插咗一浸，而家市升最好翻炒佢地，追吓落後，係一種「炒衰股」的手法。
渣打危機受控
兩隻中我喜歡渣打多少少，昨日佢升1.2％，收165.8元，仍比上周一出事前收市價188.1元，低咗11.9％。當日，美國紐約州金融監管局指控渣打在近10年間隱藏了與伊朗有關的金融交易，總額高達2500億美元，若證實可吊銷它在美國紐約的執業牌照，消息一出市場極度腳軟，若渣打被罰指控洗黑錢金額十分之一，都要250億美元(1938億港元)，若然被吊銷牌照更屬災難性，令渣打股價一度插低至149元。
渣打選擇強硬回應，英國政府顯然站在渣打後邊支持它，而美國政府也未力挺紐約州金融監管局，令人覺得指控似乎唔係咁堅實，英國《金融時報》前日引述消息稱，紐約州金融監管局希望迫渣打達成和解，要求賠償金額約5億美元(38.8億港元)，但渣打僅願賠償500萬美元(3875萬港元)，雙方未傾得掂，但和解之門仍未關上。，監管機構大力指控人去索賠，都係一個好好的搵水機會喎。
渣打去年純利368億港元，唔好話賠3900萬咁少，就算真係賠足傳聞紐約州金融局要求的38.8億，亦只係一年純利十分之一，傷係傷少少，但係只是一次性支出，只係傷及皮肉，未傷到筋骨。
我估若最後傾到2、3億美元賠償可以找數，問題遠未如開始時估計大，大市又再升吓，渣打股價磨兩磨有機會去番大跌前的水平，所以而家買都有啲值博率，若穩陣啲畀番個10％止蝕佢，等如用10％博10％。
太古看淡樓市？
昨日一隻大插股係太古地產(1972)，太古地產公佈，大股東太古集團減持2.34億股，每股作價21.53元，接近配股價範圍下限，較前日收市價折讓9.7%，套現50.4億元。大股東大折讓減持，太古地產自然無運行，一開市跌5.7%，收市跌幅收窄至4.2%，收22.85元。太古地產現價較資產值折讓24%，市盈率5.2%，話貴唔貴，不過大股東要沽咁多貨，唔大啲折讓又的確難去貨。
其實太古大股東安排太古將地產業務分拆，本意就在沽貨套現，但當日市況唔好，太古地產上市告吹，後來改做「介紹上市」，即是上市時並無IPO售股，所以最後大股東等市況好先至減持，係意料中事。太古地產持有大量優質物業，但大股東執意減持，或多或少反映佢地對樓市的宏觀睇法啦。
陸羽仁
上一頁 下一頁
金融High Tea 舊文