中環在線：太地批股拍檔高盛出局之謎 - 李華華
太古地產(1972)大股東施懷雅家族沽舊股套現50億單嘢，為市場帶嚟好多疑團，除咗估佢哋攞舊錢用嚟做乜，好多賓架呢兩日都曬頭，估緊點解同太古A(019)做開生意嘅高盛今次無份批股㗎呢?
投資銀行界都知太古同滙豐、高盛特別夾，好多生意都會預埋呢兩間投資銀行，太古地產前年上市同今年初捲土重來以介紹形式上市都有滙豐、高盛參與。嚟到今次批股，應該係比較有錢賺嘅生意，高盛竟然無份，究竟發生乜事。
冇肉食玩唔過
聽聞太地星期一吹雞做呢單刁，初時高盛、滙豐、中銀同摩根士丹利一齊開會傾，但係高盛最後無份。市傳呢單刁投資銀行其實冇肉食，由於市場反應一般，投行應承每股21.53蚊批，實質以每股21.46蚊賣畀客，自己啃7仙，拉上補下用傭金補番條數，有人就估，高盛可能計過條數覺得唔劃算，咁就費事玩。
投行續炒人
無論真相係點，呢單嘢反映投行今年生意認真麻麻，新股市場唔掂，大型批股買少見少，無乜生意，聽聞好幾間大型外資投行唔想成為傳媒焦點，無大規模裁員，只係不停陰啲陰啲炒人，一間美資大行亦醞釀炒人中，真係好風雨飄搖feel！
李華華
電郵：mailto:LiWaWa@AppleDaily.com
上一則: 業績期前銀監爆壞消息內銀不良貸款連升三季
下一則: 中環在線：皓天反口收購變收息 - 李華華
中環在線 - 李華華 舊文