金融High Tea 2012年8月16日
金融High Tea——業績壞無得守
2012年8月16日
港股在20300和20000點中間300點上落，過去五個交易日，在上周四和本周二登頂，其餘日子試底，昨日一開已低見20125點，最低走到20016點，不過亦跌唔穿20000大關，收20052點，跌239點。成交424億，繼續玩跌市成交減。
大市係橫行等緊突破，短期當然可以炒吓上落，但呢啲市一突破，就會行一大段，雖然咁講好似阿媽係女人，但係都有一個觀點，就係以為好安全去炒波幅，見高買熊，見低買牛，食得兩舖胡之後，若唔止蝕，小心輸舖爆棚。
昨日最威係隻渣打(2888)，佢宣佈同指控佢洗黑錢的紐約州金融服務局達成協議，渣打將繳交3.4億美元(約26.4億港元)罰款了事，渣打還同意紐約州金融服務局選定的監督員派駐渣打紐約分行，防此類似事件發生。
渣打獲利貨多
渣打賠錢了事，雖然無端端唔見咗26億，但已被外界擔心的銀碼少，若以佢去年盈利計，只等如純利7.1%，預料會令今年純利增長大幅下降，但這只是一次性損失。問題係渣打最後賠償的銀碼可能比呢個數目多，因為佢本來想同美國其他監管機構一齊達成和解，但其他機構未查完，佢亦等唔切，就率先同始作俑者紐約州金融服務局達成協議，但渣打最後還可能要和其他機構和解，要賠多啲。
有時睇美國的金融監管真係覺得有點搞笑，次次都罰款了事，監管機構好似變咗坐收行水的綠林大盜，只係做賊阿爸。理論上如果金融機構真係犯規，應該告佢告到尾，甚至刑事檢控拉佢坐監，但係事實上多數只是民事調查，而且為咗大家唔使打官司咁費時失事，所以一指控就傾和解，而被罰款者也不用承認責任，只要畀錢就得。若金融機構真係有錯，點解罰少少錢sorry都唔使講句就可以走？若然金融機構無錯只係被屈，係唔係怕咗在美國同政府打官司，所以你要幾多就罰幾多？而家好多美國州政府唔夠水，真係搞多幾單金融調查，就籌夠錢啦。
和解消息公佈後，渣打股價大升，最高升到177元，升6.8％，但接近3點歐洲開市左右，渣打股價開始從高位回落，最後收171.7元，只升3.6％，顯然有歐洲獲利沽盤沽低渣打。渣打和解消息雖好，但還有少少未知數跟尾，唔知其他要賠多少，而升到177元，比大跌前收市價188.1元只係差6％，都收復咗好多失地，難怪有沽盤湧現，低撈的獲利貨多，要先沽一浸。我覺得渣打可以溫和睇好，最好等佢回深啲，到170元樓價下，才好低吸。
內房股未跌完
昨日內房股陷入跌勢中，跌得最多是剛公佈7月銷售的恒大(3333)，昨日插8.1％，收報3.06元。其他內房股也偏軟，但兩大股比較好，中海外(688)股價反升0﹒5％，報17.62元，華潤置地(1109)只是微跌0.1％，造14.98元，顯示有資金從恒大避入中海外和華潤置地。其他如龍湖(960)股價跌1.3％，收11.02元，碧桂園(2007)跌2.8％。
恒大跌咁多和銷售數字不理想有關，麥格理指恒大7月份銷售令人失望，截至7月底累計合約銷售只有433億元，只達全年目標54％，跑輸行業平均水平的63％，預計該公司未來需要打折促銷，才能達到全年銷售目標。我就話而家市底差，公司業績一壞，就俾人狂插，無得守也。
據內地發展商講，好多早前捱得就捱，唔想減價太多，但踏入9月後，為追全年銷售數字，並保持有充足現金流，不能不減價，自然會影響利潤率。另外阿爺又覺得樓價高，可能會再出招打壓，最可能係全面推出房產稅(似我們的差餉)，內房股還有得跌，想低吸都最好等埋阿爺出招時先至好郁手啦。
陸羽仁
上一頁 下一頁
金融High Tea 舊文