投資的天空：冇QE3其實更理想 - 張士佳
內地股市連續兩日表現疲弱，昨日尾段的走勢更非常難睇，一下子急插至最低位收市，相對之下，港股顯得頗為強橫，雖然累計唔算升好多，但已企於20000點樓上兩日，若不是A股拖累，估計表現可更加亮麗。
今日港股究竟開大或小，視乎昨晚伯老言論及市場解讀，以近期股市、?市及商品市場的表現，投資者對QE3似乎寄望甚殷，然而，以筆者角度看，冇QE3是更理想的結果。大家都知出得QE都係為了救市，如果無問題又何須救市？就業問題一直困擾美國，若然伯老可一直唔出QE3，某程度上顯示，即使佢對就業問題唔係非常樂觀，亦談不上悲觀。另外，從技術走勢而言，港股較關鍵的水平為上月的高位20311，市場現時對QE3有頗大憧憬，若伯老如市場所願出招，大市要突破上述水平並不出奇。但試想若不出招，大市卻依然可突破，意義就明顯大得多。
後市方面，大市未突破20311前，策略上都要較為保守，不過近日大股紛紛破頂，似乎是準備向此水平挑戰。同時，今年悶聲發大財的REITs開始停滯不前，反觀一些弱勢股在低位橫行一輪後，卻出現突破，當傳媒最近才大肆吹捧REITs之時，聰明資金似乎已悄悄Risk On，因此如後市成功突破關鍵位，策略上應可較為進取了。
筆者及相關人士並未持有上述個股
作者：張士佳、曾卓鋒(元大寶來證券(香港)客戶經理)
上一則: 青心直說：貶值成救市靈丹 - 胡孟青
下一則: 外幣兌港元
投資的天空 - 張士佳 舊文