金融High Tea 2012年10月24日
金融High Tea——唔信鏡 無運行
2012年10月24日
■思捷去年底敲定轉型大計，話要在未來4年投資180億元，但新CEO馬浩思公佈最新供股計劃，集資淨額約50億元，未來恐怕還有再集資需要，股東揸住佢好難搞。
本周一港股負擔美股大跌200點的包袱開市，但一開始跌百零、二百點已經跌唔多，之後仲一路反彈，單日轉向，反跌為升，最後升145點收場，收報21697點。
和經紀張通電話，佢話唔知個市升乜鬼，咁叻升到三萬點！我見佢發晦氣，無再撩佢，我估佢一係早早沽咗貨，一係見美股跌造埋淡，總之見個市升好唔順。
我怕經紀張太過動氣影響情緒，仲叫客仔沽貨，就同佢講：「港元仲咁強，即係資金入緊嚟炒，基金都要追貨，三萬點唔會見，二萬三又如何？若然年底前升到二萬三千點，都殺死好多淡友喎。呢啲市唔買唔緊要，咪做吓塘邊鶴，唔好同佢對抗啦。」
股市好多時係咁，你唔覺得佢得，佢偏偏要升，你唔信鏡走去沽佢，一定無運行，人人唔信時，個市好易再升，升到你唔信，你唯有轉行去買，佢在那時才下跌。其實背後亦有邏輯，散戶人人睇升，個市又升，個個贏錢，邊個輸錢？到散戶人人都信，入市接貨，大戶派夠貨，先至隊跌個市都未遲。
炒殘股鬥快手遊戲
雖說個市呢兩個月突然升千幾點好似好急，但唔好睇細股，睇指數，無論國企指數或內地A股指數，彈咗一浸還在較低水平，所以反映呢啲指數的恒生H股ETF(2828)或者安碩A50基金(2823)，還遠未到貴的地步。所以正如我在星期一所講，從中短線的角度，要趁調整吸納。
你睇個市好番，炒完熱股，開始炒殘股，周一就月一大批樣衰份爆升，如造船股熔盛(1101)爆升14.5%，收報1.58元，其他如永暉焦煤(1733)、億和(838)、神威藥業(2877)皆大升8至9%等。呢啲股有一個特點，就係殘，之前一路跌跌到好殘，好似永暉焦煤，周一升到1.28元，佢去年10月仲見過高位2.89元，去年1月仲高到4.7元以上，而家距離高位非常遠。大家要知道炒殘股唔理基本因素，愈殘愈好炒，是一個鬥手快的遊戲，佢地的業績可能仲係好差，好似造船業有排未出生天，如今只係炒反彈，升可以升好多，散亦可以散得好快，炒呢啲股要自己執生。
中移動業績靚可追
最後要講吓兩隻大股。第一隻係思捷(330)，新CEO上場，突然宣佈二供一大折讓供股，集資50億。新CEO馬浩思未見有令思捷起死回生大計，卻馬上宣佈以供股集資，供股價每股8元，較周一收市價大折讓近36%。思捷上周五收12.44元，較去年9月底的低位8.32元，反彈了50％，思捷供股價比去年低價更低，散戶真係心都淡哂。思捷去年底敲定轉型大計，話要在未來4年投資180億元，但最新公佈供股計劃集資淨額約50億元，未來恐怕還有再集資需要，股東揸住佢好難搞。
另外，中移動(941)卻有好消息，公佈9月3G用戶創單月上客新高的345.5萬，上月增加30萬，中移動早前公佈增加三成3G補貼，如今收到效果，成功推升上客量。加補貼要增加開支，難得的是中移動同時公佈，首三季純利增1.4%至933億元人民幣，第三季的EBITDA(扣除利息、稅項、折舊及攤銷前利潤)，意外地按季增長近3%，顯示中移動在成本控制方面做得好好，令3G上客量和EBITDA俱升。睇完中移動業績，相信佢會走上一個新上升軌道，值得追一追。
陸羽仁
上一頁 下一頁
金融High Tea 舊文