金融High Tea 2012年10月26日
金融High Tea——愈追愈唔嫁
2012年10月26日
人人都唱熱錢流入，要炒起股市，港股盛情難卻，人跌佢升。歐美股市續跌，內地A股先升後跌，以全日最低位收市，上海深圳兩市只有1058億元，但港股脆脆哋都要升吓。中環茶友話，個市唔信又升啲、唔信又升啲，大戶好似係成個「揼雞」格。
茶友好搞鬼咁話，恒指十連升，之前個市上番兩萬點，股民十個有九個唔信，點知佢又升，搞幾日上埋兩萬一，加上港元轉強，資金流入殺聲震天，好多老散諗住等個市跌就入市，點知佢就同靚女等人追一樣，你個心愈癢，佢就愈矜持，你追佢就唔嫁，當你追得咁辛苦，咁你係咪覺得個女仔好靚呢？
十連升搞到股民心癢癢
大戶擺出個咁口既「揼雞」格，當大家以為恒指連升九日之後，都係時候唞唞氣，恒指在內地收市後神奇地掉頭向上，創出十連升的超長氣升勢。恒指收市升46點，報21810點，國企指數弱一些，差少少至收復失地，微跌22點至10616點，不過大市成交縮減至612億元。
茶友話，呢個十連升指數升幅唔算扯得好盡，成交都係六百億左右，雖然有人用資金市嚟形容目前環境，但實際資金購買力雖然唔算強，反而係市場貨源都幾乾。今年個市大部份時間都係上上落落，悶到抽筋，好多無耐性或缺乏實力的股民都悶到離場，剩低的都有番啲實力，持貨力比較強，故此唔使好大力，都已經夠力頂住個市唔跌，昨日就輪到炒吓濠賭股維持吓氣氛。
講到尾，個市升足十日，點都有回吐壓力，如果唔睇指數，好多股份都已出現調整。主要板塊中，比較弱的是中資金融股，恒生中國H股金融行業指數逆市跌0.5%，內銀股等緊公布業績，板塊表現最差內銀股係中信行(988)，跌2.7%，農行(1288)跌1.5%；內保股最弱係平保(2318)及新華保險(1336)，齊跌逾1%。以市論市，無論男追女，抑或女追男，無可能永遠唔停咁追落去，如果個女仔唔停一停，等個男仔可以埋到身，遊戲又點繼續呢？呢個道理股場同情場都一樣。
港股現時最大本錢，係息低價錢平。分析師普遍認為中國經濟最壞時刻已經過去，內地股市經過一輪長時間下跌，P/E已經去到只有12，遠較正常時期27低。由於全球利率低企，持貨機會成績好少，資金積極部署趁低吸納中資股。由於外地資金買唔到A股，只能夠買H股，資金就不斷湧入香港，搞到金管局要不停買美元沽港元，去維持聯繫匯率。
昨日市場焦點係與核電有關股份。溫總主持國務院常務會議，討論通過《能源發展「十二五」規劃》，當中討論到核設施重啟規劃。
核電設備股借機唞氣
會後宣佈「十二五」期間將不安排建設內陸核電項目。內地現時已有的核電項目都集中在沿海區域，隨着內陸不斷發展，能源需求大幅增長，在內陸修建核電站的呼聲四起。
唔少發電公司已做好在內地興建核電廠計劃及準備，現在中央突然叫停發展計劃。例如江西彭澤核電項目可能要擱淺。有份參與國ST贛能及深南電等上市公司即刻中招。
受消息影響，核電廠及相關企業個別發展，上海電氣(2727)插5.7%，東北電氣(042)重創，勁插近一成半！哈電(2302)同中核(2302)就有得升。呢類股份炒咗一輪反彈，而家就借消息唞唞氣先。
陸羽仁
上一頁 下一頁
金融High Tea 舊文