投資的天空：五年魔咒好驚嚇 - 張士佳
大市前日借內銀帶動，由頭升到尾，可惜美股繼續尋底，昨日就將前日升幅全數蒸發。跌一日，升一日，跌一日，趨勢難尋。
筆者扒逆水，前日買，昨日水瓜打狗，唔見一截，且戰且退。行情雖差，但既然已減持部份股票，且今次以衍生工具造好，蝕曬有限，心理上舒服點。昨日雖然跌得甘，但個股表現都唔係太差，大概跌2%至3%，組合個股自然亦跟隨大市下跌，然昨天開的三個好倉都有得升，萬幸萬幸。汰弱留強，今天開市先為理文造紙(2314)平倉，留現金搵位再買。
A股日日唔生性，好似無底深潭，十八大開完又未見實質支持，加上奧巴馬開出富人稅的額度，共和黨肯定不會輕易就範，又係一輪討價還價，歐洲更係得個拖字，中歐美乏善足陳，似乎灰到黑，但士佳唔係太悲觀，個股無乜好炒，卻往往是大市彈的時候，試番21800以上，唔會太難。短線倘可，中線就要小心點，若大家回想過去換屆年份2007、2002、1997、1992、1987，三次股災，兩次下跌，今晚在有線電視「Money Cafe」講講這個驚嚇過萬聖節的五年魔咒，再睇睇技術分析拆解大市及個股的小技倆。
筆者並未持有理文造紙
張士佳(寶來證券(香港)資產管理部董事)
與曾卓鋒(元大寶來證券(香港)客戶經理)聯合執筆
逢周三、五刊出
上一則: 青心直說：炒股要跟實叻人 - 胡孟青
下一則: 炒友Blog：調整近尾聲上電闖3.5元 - 邱古奇
投資的天空 - 張士佳 舊文