青心直說 - 胡孟青 2012年11月16日
青心直說：炒股要跟實叻人 - 胡孟青
大家都認識美國金牌泳手菲爾普斯(Michael Phelps)，但對於1972年慕尼黑奧運會上連奪七面金牌、其紀錄於30多年後才被菲爾普斯打破的一代水怪史畢茲(Mark Spitz)，又可會有印象？其招牌標誌是阿Lam般的二撇雞鬍子，這造型在泳手中十分罕見。當年的史畢茲，因與教練鬥氣，於是蓄起鬍子，更效法披頭四，留有被視為影響成績的長髮。他不靠甚麼鯊魚戰衣、海豚裝等高科技裝備突圍，更不用泳鏡泳帽，全靠原始天分與個人努力，絕對是真材實料。
逆向思維想得透徹
話說當年曾有人迷信史畢茲的二撇雞，就是有助其去水的「吉祥物」，竟紛紛效法，結果當然係得啖笑。很明顯，史畢茲遊得快，不是歸功於他的招牌鬍鬚，而是他所身處的遊泳俱樂部及其教練。因為身邊的人強，才會令自己更強。你要強，首先要擺自己在強人和叻人的身邊，才會遇強越強。投資也是一樣，一知半解、人雲亦雲，多不會有好結果，好彩狗屎撞馬棍就當別論。
在這紛擾的世界中，想要看得清，想得透，就要懂得Reverse Thinking，即換另一角度反過來再思考，反思可把事物想得更透徹。叻?人唔需要買股票，只會搭個棚印股票畀你炒。大家在入市買股票前，有冇諗過，點解會有老闆特登開間公司，含辛茹苦湊大，然後使大筆錢申請掛牌上市，還要與你分身家兼搭埋同一條船，真係咁著數？
港股由9月7日發力，升足兩個月，到11月7日轉勢，此輪升勢是否對辦，各有各睇。但我覺得，與其說十八大後是蜜月期，倒不如視之為政策真空期，當炒的都已炒了數轉，不應炒的，炒來都係浪費光陰，投資者此刻應休養生息靜待聖誕冬至，明年1月才再戰魚缸。
胡孟青
獨立股評人
上一則: 財智語陸：吸資減慢繼續防守 - 陳永陸
下一則: 投資的天空：五年魔咒好驚嚇 - 張士佳
青心直說 - 胡孟青 舊文