金融High Tea 2012年11月30日
金融High Tea——嘴唇舞
2012年11月30日
美股跟住美國政客的嘴唇跳舞，眾議院議長博納話對解決「財政懸崖」問題有信心，美股即時止跌回升，抽高220點。恒指昨日係期指結算日，往常都係定格走勢。適逢美股造好，內地A股開局正面，港股頭頂兩把劍無晒，加上資金流入，港股即時醒晒，跟住大幅炒上。不過，好友以大家以為今日有大茶飯食的時候，內地「大熊」來襲，恒指跌番134點。內地股市收爐，恒指又回復升勢，收市報21922點，漲213點，成交只有460億元。
資金不斷流入香港，以前熱錢最鍾情係地產市場，不過由於樓價已經升到好高，政府又打壓樓市，令交易成本不斷提高，炒樓已經好難搵到錢。熱錢需要搵出路，似乎只有股市一途。本地樓市老早已經超越九七年高峰，股市只係高峰時三份二，金融及地產股相對落後，成為炒賣主要對象。
炒樓熱錢要找出路
中港兩地金融股全線向上，當中最威係創興銀行(1111)，創興銀行首次有非廖氏家族成員出任CEO，外界解讀為創興銀行部署賣盤，股價爆升超過一成一，收15.2元。母公司廖創興企業(194)抽高6.5%至8.5元。 內房股大炒落後，連受主席醜聞拖累的恒盛都爆上。近日內地賣地價錢硬淨，加上十八大後換屆，未必有政策嚴打樓市，內房公司賣樓成績回勇，傳統旺季「金九銀十」雖然略淡，但購買力往後保持，內房公司雖然毛利可能略為下降，只要能夠做到資金回籠，好多內房股市盈率都唔貴，於是吸引資金落疊。
穆迪公佈，將中國地產行業評級前景由「負面」上調為「穩定」。穆迪助理副總裁Franco Leung表示，預計未來一年中國房屋銷售量將有個位數百分比的增長。他還表示，對於首套房購買者的按揭貸款放鬆，對住房開發力度的增加，潛在的剛性需求，以及城市化將引發房屋銷量增加。
內房板塊循環式上升
他又指，中國平均房價未來一年將有輕微下跌，因為發展商已將市場重點從高檔房轉向大眾市場。穆迪同時認為政府不會再收緊政策，因為現行措施在打擊投機和平抑房價方面起到作用，報告成為利好呢個板塊的催化劑。
睇番內房板塊，升浪呈循環式向上，先係升優質股好似中國海外(688)，華潤置地(1109)，跟住就炒落後，唔係一爆上就玩完，反映資金追逐呢類股份，個別低市盈率的大股好似恒大(3333)，富力近日升完再升。
德銀前日就發表報告，揀咗大堆股份，話內房行業中較看好中渝置地(1224)、佳兆業(1638)、融創(1918)、五礦建設(230)及建業地產(832)，營運強勁及見改善，均予「買入」評級，呢幾隻股份呢兩日都爆上。
該行預期大部份內房股明年可銷售資源增長正面。大型及中型內房企業中，恒大及雅居樂(3383)之增長料僅分別為9％及5％。雖然大行預計售樓增長慢，但因為市盈率夠低，好可能唞唞又再上。
陸羽仁
上一頁 下一頁
金融High Tea 舊文