金融High Tea 2012年11月7日
金融High Tea——落後內房要發力
2012年11月7日
港股真係有番咁上下硬度，昨日遇到匯控(005)季績差過預期捱沽，加上內地股市一度跌過1.5%，但港股最多只係跌百幾點，最後內地反彈只跌0.4%，恒指亦收窄到只跌61點，即係0.3%收市，單係匯控都帶動大市跌咗44點，大市都頂得住吓。
而家市場都在找落後股，最好落後得來有少少轉勢苗頭的股份，我估從炒作的角度，可以內房股中尋寶。內地房市本有「金九銀十」之說，今年九月銷售不理想，「金九」不成，令人對十月也睇淡，出現「銀九銅十」之說。不過睇恒大地產(3333)公佈10月銷售數字，又唔係咁差喎。
恒大10月份實現合約銷售額142.6億元人民幣，比9月大升76%，單月銷售額及銷售面積皆創新記錄；合約銷售均價每平方米5,590元，同9月均價5,577元差唔遠，表面看恒大唔使再深度減價都去到貨。10月份新開盤項目4個，在售項目累計達168個。
恒大銷售後上有力
恒大今年首十個月累計實現合約銷售額728.3億元，完成全年合約銷售目標800億的91%，累計合約銷售均價每平方米5,930元。老實講上個月恒大公佈頭九個月累計銷售585億，只佔全年目標的73%，外界有少少擔心佢第四季若後勁不繼，全年銷售隨時不達標，但經10月一衝，相信全年達標應無懸念。
早前中國海外(688)對內地第四季房市評價得較審慎，令人有點擔心後市，但睇恒大月度銷售唔錯，似乎唔使睇得太淡。恒大早前受老外調研公司狙擊，加上銷情落後，股價好軟，直到10月中才開始衝了一段，昨收3.55元，跌1.5%，若稍後股價回吐至3.4元樓下，可以低吸走中短線。
近期追落後的金融股昨日有回吐，匯控(005)季度業績差過預期，昨日股價受壓，跌1.3%收76.7元。大笨象業績唔靚仔，但多間大行包括高盛、大摩及摩根大通都對匯控睇高一線。高盛認為匯控第三季實際基本稅前盈利錄得50億美元，差過該行預期的54億，係要為美國反洗黑錢指控再撥備8億，及提撥3.53億為賠償英國客戶作準備，若撇除上述因素，核心經營趨勢好過預測。高盛重申匯控「買入」評級，目標價同大摩及摩根大通一樣睇83元。花旗仲樂觀，目標價睇84.2元。
匯控業績內藏利好
匯控因為有洗黑錢之嫌，上季被美國罰款7億美元，今季撥備8億，利潤無端唔見了15億美元，不過匯控行政總裁歐智華先做好期望管理，在業績電話會議上再次重申，最終罰款可能「顯著超過」15億美元。佢有多家大行睇好，股價都唔算跌得多咯。
中央不斷推出政策挺各行各業，近日傳出中央將補貼太陽能光伏發電行業及頁岩氣行業。頁岩氣股份炒上，表現最標青係安東油田服務(3337)，安東油田勁升超過8%至2.53元，創了五年新高，華油能源(1251)漲近半成。太陽能股上日已大升，生產光伏發電產品的鉑陽太陽能(566)昨日再抽高一成一。中國一直被歐盟投訴補貼太陽能產品，終於出招反擊歐盟，北京上日向世界貿易組織提出申訴，指意大利和希臘向主要用於當地採購部件的太陽能電力生產商，提供較高的上網電價，違反世貿規定。中央的反擊利好太陽能股，可以繼續炒吓佢哋轉勢。
陸羽仁
上一頁 下一頁
金融High Tea 舊文