金融High Tea 2012年12月12日
金融High Tea——最細的問題
2012年12月12日
■滙控要就洗黑錢的指控賠19.2億美元，稍高過早前佢話要撥備15億美元。資料圖片
■渣打就要再賠3.3億美元畀美國。資料圖片
這個世界真是和解的世界，昨天真係有好多單和解新聞，前國際貨幣基金會總裁卡恩涉嫌強姦紐約酒店女服務員案和解，傳聞卡恩要賠600萬美元(即4650萬港元)，一時衝動代價驚人。而匯控(005)及渣打(2888)亦和美國就洗黑錢的指控和解，匯控要賠19.2億美元，稍高過早前佢話要撥備15億美元，另外匯控亦表示好快就會和英國就操控利率指控和解。
渣打就要再賠3.3億美元俾美國，加埋早前承諾賠俾紐約州金融服務局的3.4億，合共要賠6.7億。壞消息確定後，反而利好股價，昨日兩隻股表現唔錯，渣打升0.6%，匯控就升0.3%，都跑贏大市的0.2%升幅。
美國係打官司最鍾意和解的國家，即使好嚴重的民事甚至刑事指控，都可以和解，凡係錢可以和解的問題，都係最細的問題啦。好似渣打咁，當日紐約州金融服務部對佢指控極嚴重，話佢進行欺騙性和欺詐性行為，為伊朗金融機構通過紐約分行轉移至少2500億美元，指控非常誇張，令渣打股價兩日跌咗15%，如今賠6.7億就了事。
渣打可追落後
以賠款比例計，渣打去年純利47.5億美元，今次先後賠俾美國6.7億幾美元，等如佢去年盈利的14%。匯控去年純利162.2億美元，賠償等如佢去年盈利11.8%，比例比渣打略少。
大家唔好忘記，呢一期匯控股價跑贏渣打好多，匯控早已創新高，渣打昨收185.5元，比今年3月高位204元，仍低9%。而匯控昨收79.7元，早已升穿2月高位71.8元。以現價計，匯控股價等如11.2倍市盈、4厘息，渣打現價市盈率11.9倍市盈率，3.3厘息，渣打大量業務在新興市場，理應增長較快，過去市盈率比匯控高好多，但而家匯控升得多，渣打的股價市盈率差不多俾人追上。
匯控股價近期咁強，和佢公佈賣嘢大計有關，佢不但計劃將有毒資產賣走，更賣非核心資產套現，市場好認同佢呢種做法，所以股價有表現。渣打相對無匯控咁多動作，加上身處的亞洲市場上半年經濟放慢，所以佢股價表現亦麻麻。但匯控今年中期業績要倒退8.7%，而渣打中期純利還有11.5%增長，加上亞洲市場第四季有復甦趨勢，照計渣打往後有條件追番少少落後。
除咗兩間銀行和解消息，市場消化緊最近大市升幅。習近平南巡，只限收料無放料。內地A股彈一輪之後輕微回調，上證綜指跌9點，收報2075點。港股係資金不斷湧入下跌唔到，恒指收市升47點至22323點，國企指數指跌2點，成交微減至592億元。
國企搭上市尾班車
金管局昨日再接美元沽盤，向市場注入62億港元，香港銀行體系戶口結餘後日將增至2145億元，係資金增加下唔少中資及國企股趕搭尾班車，在年底前上市。預計有四隻新股計劃上市，預計集資66億元。昨日公開招股的中國機械設備工程(1829)，發行7.18億股，招股價介乎4.1至5.4元，預計在21日掛牌。中國機械為央企國機集團旗下，今次上市亦以中資券商承銷為主。
另外三隻要趕在今年上市的新股全部同樣由中資銀行承銷，包括中國白銀集團(815)石油工程承辦商惠生集團(2236)及內房股金輪集團。
陸羽仁
上一頁 下一頁
金融High Tea 舊文