金融High Tea 2012年12月14日
金融High Tea——抽中你 無運行
2012年12月14日
■中電昨日插3.6%，去到64.8元收市。資料圖片
美國聯儲局開動印鈔機停唔到，昨日聯儲局議息會議結束前，市場本來估佢出QE3.5版(量化寬鬆3.5版)，點知佢出到QE4.0版，唔止維持每月用400億美元買按揭債，仲因為沽短債買長債的所謂「扭曲操作」到期，每個月用多450億美元買債，即係每月共印850億美元，真係唔驚水唔多。
過去扭曲操作係無印多到銀紙，聯儲局沽出手持的短期國債，轉為買入長期國債，左手入右手出，以支持長債債價，推低長債債息。但而家每月450億唔係沽短買長，係直接印錢去買，所以係加碼。仲有聯儲局唔再提低息到2014年年底，改為明確定出指標，首要目標係美國失業率要跌到6.5%以下，而通脹率目標過去係2%，而家可以容忍通脹率到2.5%，換言之唔將失業率壓到6.5%，放水兼低息政策唔會停。
加碼QE 無人睇好
市場有少少怕聯儲局會在2014年底前加息，所以美債債價在加碼買債聲中，不升反跌，孳息上升。我更擔心伯南克其實只係孤注一擲，但只有印錢的貨幣政策，沒有直接注血液入實體經濟的財政政策，救極唔掂，只會搞出第二浪環球通脹。而且美國成日話中國人民幣被低估，其實係佢自己大印銀紙隊低自己貨幣，然後好惡咁話「你啲貨幣做乜唔升值呀？」佢救到自己出生天會停手，怕佢救唔到自己呢個過程就不斷重演，焗你炒，炒到爆，佢唔死我哋死(樓市較高危)。
由於美股無乜升，後來大陸股市回吐，港股亦乏力，但跌亦唔想跌，結果大陸上證綜指跌1％，恒指只係回57點，即係0.3%。昨日跌得較多係地產股，個別如長實(001)跌1.6%，美國加碼QE本來應該有利短期樓市，但市場好似唔係幾信。
一幅將軍澳臨海地昨日由會德豐(020)以19.68億投得，樓面呎價4579元，比早前投得的附近地皮，平咗7%。其他發展商咁審慎，似乎唔係咁睇好大市喎。
自從推咗15%的外地人買家印花稅之後，新盤去貨慢晒，大發展商睇到個勢，連投地都好似手窒埋，到底係做個樣俾政府睇，想政府鬆手啲，定係真係唔睇好，都要睇睇至知。
中電配股 無古仔講
昨日跌得勁的股票，好多同伸手有關，最大隻係隻中電(002)，突然配售集資75.6億元，配股價62.9至63.9元，較上日收市價67.2元折讓4.9至6.4%。中電配股令人意外，昨日插3.6%去到64.8元收，雖然未到配股價，但都好傷，你知買中電的人多數收吓息，或者食3、5%差價，今次一鋪打回原形。
市場亦唔係咁睇好，因為中電無乜特別嘢做，無古仔講，令人覺得佢只係認為價高集吓資。未來資產管理估計，由於新股份數目增加，該行將目標價由72元下調至69元，維持「持有」評級。
另一隻俾人配股的是佳兆業集團(1638)，傳基金股東凱雷配售2.16億佳兆業舊股，每股配售價為2.35至2.45元(比上日收市價折讓5.4%至9.3%)，結果佳兆業昨日跌7.7%。你睇番佳兆業股價一個月前仲在1.5元上徘徊，之後急升，早兩日最高炒到2.7元，升得咁急，唔沽就笨。個市郁郁吓，你揸住的股票升得多，好易成為配股對象，抽中你個隻就無運行，如果係炒作，見手上股票升得急有錢賺減持少少都無壞，至少食吓胡嘛。
陸羽仁
上一頁 下一頁
金融High Tea 舊文