金融High Tea 2012年12月6日
金融High Tea——中國點火？
2012年12月6日
港股昨日終於威番次啦，上午主要跟阿爺升，內地上證綜指升2.9％，香港跟得好貼，但三點內地收市後港股唔止無回吐，仲再升多百幾點，結果恒指升咗470點，升幅2.2％，期指仲要升598點，升到22340點，成交高達947億，今次升市有啲勢。資金繼續流入，金管局連續兩日入市，昨日仲要在亞洲時段入市，都造就咗港股上升的氣勢。
香港的升市源於內地，昨日上晝內地股市已升2％以上，經紀張話做乜內地升咁多，我反問佢知唔知內地之前跌咗幾多？內地股市次次都係咁，跌鑊甘之後，會有報復式反彈。正如高盛所講，內地A股跌到9倍市盈率，比H股的9.7倍更低，大幅反彈亦正常過正常。
成交急升外資入場
當然，見到內地個市係咁升，市場亦流傳幾個理由：第一，中央政治局周二開會，阿爺認為拉動經濟的「三頭馬車」，要分出「先後」，明年重心是擴大國內需求，培育一批拉動力強的消費新增長點，講明投資只會有加無減，積極擴大先進技術設備、關鍵零部件和能源原材料以及消費品進口，又話會維持積極的財政政策和穩健的貨幣政策。第二，社科院剛發佈2013年《經濟藍皮書》，對內地經濟前景繼續樂觀，預計2012年全年GDP增速為7.7%，通脹升幅為2.7%.2013年全年GDP增長8.2%，通脹升幅為3%，社科院對明年經濟增長預計比市場預期高。第三，傳聞保監會將放寬讓保險公司投資股市。
中國經濟肯定在點火中，但內地股市係唔係就此點火，仲未知，不過即使睇淡中國的老外，都覺得玩沽空中國股票的風險大增。正當美國大力逼迫四大核數師行交中國公司核數資料時，當日點起狙擊中國概念股的渾水公司，其創始人卡森 ·布洛克在11月底卻突然宣佈，由於投機機會減少，繼續沽空中國概念股已經非常困難，因此決定淡出沽空中概股市場，他會在其他資本市場重新尋找沽空的商機。在布洛克決定唔玩之前的3個月時間，無理是渾水公司還是另一家以沽空中國概念股出名的香櫞公司，亦沒有發佈沽空中概股的報告，看來自2010年開始出現針對中國概念股的沽空行動已暫告一段落。
中概空軍暫時收韁
我就話股價都唔會永遠下跌，好多內地股票已跌到茶渣價，你仲走去沽佢，佢搵到一些講價值投資的基金入股時，隨時可以把沽空者挾死。見微知著，中國股票即使未見底，都離底不遠了。
有分析指今次中央政治局會議對於經濟工作的定調更側重於效益和品質，着重促進投資穩定增長和產業結構優化，在更嚴格的控制產能過剩問題的情況下，預計各行各業會有大規模重組兼併，汰弱留強，減少惡性競爭，行業龍頭有利。
中央為中港股市打咗支補針，近期跌到傻的中資金融股，大追落後。恒生中國H股金融行業指數爆升超過3.4%。「五保九行」全線大幅反彈。國壽(2628)及平保(2318)大升超過4%，新華保險(1336)更勁升8.3%。內銀股巨型啲升勢雖然無保險咁勁，但都相當厲害，四大行中以建行(939)升3.4%最勁，終於威過升1.6％的匯控(005)啦。不過咁，匯控收80元已是52周新高，建行收6.07元，距離一年高位6.62元，仲有一成差距喎，有得追有得追。
陸羽仁
上一頁 下一頁
金融High Tea 舊文