金融High Tea 2013年5月10日
金融High Tea——坐住隻象
2013年5月10日
內地通脹數字高過預期，觸發中資股回吐，金融股係沽貨主要目標。平保(2318)及財險(2328)跌超過1%，新華保險(1336)最弱，跌超過2%。主要原因係中保監近日開始實施分級管理保險公司業務範圍。對於擴展類業務，設置了財務、風險管理能力、合規經營等三類條件指標。新設保險公司只能申請基礎類業務，在獲得基礎類前三項業務經營資質後，方可申請增加擴展類業務，且每次只能申請一項，兩次申請的間隔不少於六個月。
「分級管理」增加了保險行業的准入門檻。減低了市場惡性競爭，明顯對國壽這些龍頭企業有利。市場消化了消息後，國壽(2628)午曾後反彈，收市重上22元上方，微跌0.9%，跑贏同業。
港交所續被唱淡
德勤華永會計師事務所警告，影響長三角地區銀行分支的內地壞帳問題將蔓延沿海地區，如山東、福建和廣東省。認為「壞帳區域蔓延的危險性不容忽視。」去年，江蘇和浙江省已有一系列地下銀行系統醜聞和鋼材貿易商騙取貸款的問題曝光。不過，內銀股表現平穩，中行(3988)仲逆市上升0.5%。
內地股市唔爭氣，雖然美股又創新高，港股高開109點，但跟住就腳軟，至A股尾市反彈，才逐步收窄跌幅。恒指收跌33點至23211點，國企股微跌17點，收11267點。
港交所(388)首季每股基本盈利1.01元，不計倫敦金屬交易所豁下資產公平值收益增加1.07億元，每股核心盈利低過市場預期。高盛指港交所營收疲軟，評級維持「沽售」，目標價105元，相當於2013年預測市盈率26倍。受大行唱淡拖累，港交所昨日跌2.7%至130.7元。
大笨象匯控昨日再升一個價位，雖然少少哋，都係叫做創出十一連升。有好多人問點睇？中環茶友傾起，就話要睇你係想追入抑或係已經有貨。若然係想追入，佢升咁多，不妨睇定先，但若果係有貨，就無需要沽住啫！
大笨象呢排強勢，散戶多數唔敢追，茶友估計，問得呢隻股，好多都係手頭有蟹貨，想止蝕，又或者低價入咗啲想食胡。若然係食胡，基本上幾時都唔拘，至於沽蟹貨，咁就要問賣完之後有無更好對象。
匯控開出加息期票
茶友話，匯豐今次業績，外界話好過預期，係唔係就見仁見智啦，有人話佢收益有不少來自盤房炒嘢贏番嚟，炒嘢可賺可蝕，盈利質素唔係咁高喎。呢個說法不無道理，從好方面嚟睇，今次係匯控近期業績首次達到大班訂下的財務指標，最實惠係大班開出期票，話考慮增加派息，匯控股息有近四厘，聽高層語氣，將來就算唔增加派息，至少都唔會減。
散戶投資多數心理係敢蝕唔敢賺，輸錢時候就死坐，到一浮上水面就急急跳船。不過，大戶如果可以炒上放生老散，背後或者有佢理由。茶友坦言，匯控生意遍及全球，涉及範圍由按揭到外匯炒賣，自己真係唔識睇前景，只能從基本功去做評估，呢個分析同匯控前景無關係，而只係一般的市場智慧。既然坐咗咁耐，點解唔坐住隻大笨象多一陣呢？照計好過套現擺番係匯控戶口啩！
陸羽仁
上一頁 下一頁
金融High Tea 舊文