陸羽仁 BLOG 2013年8月23日
行不得也哥哥
2013/8/23 上午 08:05:19
網誌分類: 經濟
美國10年期國債息昨日突破2.9厘大關，原來預計美股會大大鑊。但美國國內以及歐元區及中國齊齊公佈的經濟數據，都好過預期，亞洲股市靠穩，歐洲股市反彈，改善了市場氣氛，再加上波士頓聯儲主席的鴿派言論，沖淡了投資者對聯儲局即將退市的緊張情緒。杜指六連跌後終於出現反彈。
杜指收市升66點，報14964點；標準普爾500指數漲14點至1657點。杜指尾市最終上唔番萬五點關口。我覺得昨日的升市，只係近期跌得太急太勁，趁勢反彈一下而已。加上昨日納指市場因為報價軟件死火，歷史性暫停交易超過三小時，大市成交量創歷史新低，炒高個市又唔係咁難喎，估計大市繼續下行的格局仍未改變。
市場氣氛好轉的原因主要係中國及德國的8月份採購經理人指數(PMI)數據理想，匯豐銀行公佈其編製的PMI初值升至50.1，創了4個月新高，接近中國官方7月份公佈的50.3。而Markit公佈的德國PMI亦升至7個月新高。反映中國及歐元區的私營企業部份的營運正在逐步改善。
國內方面，美國最近一周首次申請失業救濟人數增加1.3萬升至33.6萬人，稍為高過市場預期的33萬人。四周移動平均周計算，則下降2250人至33.5萬，創了2007年11月以來新低。另外，美國7月領先經濟指標指數上漲0.6%至96。
據過往經驗，國內外，尤其係美國的經濟數據理想，總會挑動投資者對聯儲局提早退市的憂慮，好消息當成壞消息去炒。再加上美國10年期國債息上日稍微回軟，昨日又升過，仲突破2.9厘關口，(最新報2.889厘)。除了有撈底盤支持外，與波士頓聯儲主席羅森格倫(EricRosengren) 的安撫言論不無關係。
羅森格倫昨日接受《華爾街日報》採訪時表示，「如果不確定經濟改善的實際強度，不確定是否具有自我可持續性，那麼，在購債規模上，應該進行很小的調整。而目前應該謹慎並保持警惕。」他補充，聯儲局減少買債的規模應該是有限的。
睇美國經濟近期公佈的數據，經濟無疑在甦復當中，但又遠遠講唔上已經去到繁榮興盛的地步。這就令聯儲局進退兩難，這也是為什麼聯儲局總係俾唔到幾時開始退市，同縮減多少的明確指引的原因。問題係，聯儲局一日沒有明確表態，對市場而言就像是頭上懸掛的一把劍。要知道，不確定因素往往比該利淡因素更具殺傷力。
聯儲局最希望做到的情況係在退市的同期，市場利率能夠保持穩定，甚至維持不變，股市可以穩步過渡。到經濟回復正常時，市場利率才慢慢攀升至正常情況。不過，睇現時形勢，聯儲局的如意算盤因市場對退市的預期，造成國債利率飆升，已經開始打唔響。聯儲局現在的情況係退市難，唔退市仲難！
陸羽仁
回應(1) 我想回應
陸羽仁 BLOG 舊文