金融High Tea 2013年8月29日
金融High Tea——要撈就撈大股
2013年8月29日
聯儲局幾時收水懸而未決、美國債務上限爭拗再度逼近，加上美國可能對敍利亞採取軍事行動，全球股市本已受壓，加上大股如中石油(857)、昆侖能源(135)等出事，大市急插，即使內地A股回穩，亦無補於事。
恒指全日都在跌幅300點以下橫行，收報21524點，大跌350點；國企指數仲弱，挫223點；大市成交跳升至631億元，較上日激增超過三成，跌市成交大，唔係幾好兆頭。
昨日的總成交金額，有接近11%，約69億元來自匯控(14.5億)、中石油(23.9億)及昆侖能源(30億)。包括匯控在內多家銀行被歐盟指控操控倫敦拆息市場，一旦罪成，最高可能被罰觸犯條例前一年(2005年)的營業額之10%，估算匯控罰款會高達39億英鎊(468億港元)。匯控昨日跌1.3%，收82元，又唔算多。
匯控或遭罰款
匯控的跌幅和昆侖能源同佢阿媽中石油無得比。昆侖能源勁插接14%，收報10.88元，創了52周最低位。中石油則跌逾4%，收8.27元。
呢一浪中石油大地震由周一開始，官方先公佈中石油母公司中石油集團副總經理兼大慶油田總經理王永春，涉嫌嚴重違紀，被中紀委調查。王永春係中共十八大中央候補委員，成為新一屆第二個落馬的中央候補委員，消息十分震撼。到周二再公佈3名中石油高管涉項目招標貪腐受查，包括昆侖能源董事長李華林。
今次李華林等出事，和薄熙來倒台、支持薄的前政治局常委周永康出問題有關。當日阿爺要拉薄熙來，但主管公安系統的周永康唔肯郁手，搞到阿爺要出動中央警衞局(即係御林軍)去拉人。而家阿爺正郁緊周永康隔籬左右的人，李華林在內地官場有「周永康跟班」之稱，就中箭落馬。
昆侖能源老總出事食到應，問題係內地人會唔會咁遲先知？昆侖能源股價在7月中下旬已開始轉弱，表面上看是內地加天然氣價令到下游分銷公司承壓，但證券界話，下游燃氣分銷僅佔昆侖能源2013年盈利的20%，當中僅30%會受到是次加價影響。昆侖股價一直走弱，可能係有春江鴨一早沽定先。
昆侖可分注吸
昆侖是中石油拆出來做天然氣銷售的公司，以中石油的背景和昆侖能源的規模，等如一檔半獨市生意。如今老總出事，換新老總入來，即使洗太平地，否定前朝所做的事情，但點講都要搞好檔生意。
昆侖跌到而家只係13倍市盈率、2.1厘息率，以燃氣公司來說開始吸引，現股價等如佢2010年的股價水平，佢當年只賺42億，去年已增加到賺65億。佢去年做330億生意，過去公司高層講過要注入資產，令生意額升上500億至1000億，即係話還有不少擴充前景。記得2012年4月，昆侖以13.1元配股集資102億，淡馬錫都入咗股，即係話而家買仲平過淡馬錫17%！我話佢跌咗咁多價值開始浮現，保守點可以分三注買入，現價一注，跌到10元一注，9元一注。進取點可以調高後面注碼的買入價，或買唔齊時反手追貨。
好多人見到股份大跌鍾意撈底，我一般對呢啲做法有保留，特別係啲細股或民企股，怕撈到隻股停埋牌執埋笠，咁就死得啦，所以要撈只能撈大股，好似昆侖能源呢啲大股無執笠的問題，鐵打的衙門流水的官，博佢插深啲買平貨仲好，我自己都買咗少少贈吓興。
陸羽仁
上一頁 下一頁
金融High Tea 舊文