陸羽仁 BLOG 2014年6月26日
老細老細６
2014/6/26 10:21:48
網誌分類: 經濟
美國今年首季度經濟增長數字比預期更差，昨日朝早公佈的第1季GDP增長終值數字，由早前公布的萎縮1%，大幅修訂至萎縮2.9%，更係遠差過市場預期的萎縮1.8%，這是雷曼兄弟公司倒閉以後最大的經濟跌幅。另外，美國5月耐用品訂單月按月下滑1%，也差過預期的下滑0.5%。跌幅大過上月的0.6%。
不過第1季增長數字唔掂唔等如第2季都唔掂。而美國6月服務業PMI初值61.2，創了2009年10月來新高，亦高過市場預期的58。美國經濟數據出爐後，高盛證券將美國第二季度GDP追蹤預測值從3.8%上調為4%。令投資氣氛回暖，美股只在朝是跌一跌，好快就收復失地，緩慢走上。
杜指收市升49點至16,868點；標普500指數升10點，收報1960點. 納指漲29點至4380點。
行業中醫保股受惠多單併購消息，表現出眾，其中Owens & Minor Inc以2.08億美元收購Medical Action Industries，令後者股價暴漲94%。而煉油股顯著受挫。其中瓦萊羅石油、特索羅石油及馬拉松石油，分別大跌4%至8%。主要原因係有報導指美國總統奧巴馬已經準備逐步向國際市場開放美國石油市場，這是40年來首次。
美股近期屢創新高，擋也擋不住，大市今個星期休整兩日，昨日在美國首季GDP增長非常唔得，5月耐用品訂單增長亦唔掂的情況下，照升如儀。嘉信理財投資首席投資官阿奎那(Omar Aguilar)表示，「GDP數據可能引起股市波動，但不足以破壞股市行情。」市場普遍預期杜指的短期目標係17000點，而瑞銀駐紐交所地區總監Art Cashin睇法更為樂觀，佢認為17000點只係心理關口，但用上技術分析，杜指比較大的阻力位是17200點，而標普500指數是1969點至1974點範圍。不過，Cashin指出, 美股呢個星期會在高位反覆。因為係6月最後一個星期，期權到期，大市表現一般都會比較弱，在過去24年，當中有21年都係咁。
繼續講講辦公室風雲。在歐洲行打工的朋友Peter在老細出錯後，捱義氣做關雲長，孭鑊上身，逐步上位。有網友話:「但係換咗Peter在另一個美資投行打工或David做上司，關雲長走去自插三刀，呵呵，可能多謝都無句，順便數埋人頭被裁員！」我都信，有時打工係命水而矣，但練好工夫，等好運到來時自己接得住，都係一個關鍵。判斷做唔做關雲長，都係一種工夫。
講番關雲長Peter收到老細消息，話舊老細David嚟搵工，想做佢下面個位。Peter第一個反應係好開心，心諗我捱咗咁耐升到咁高，都唔夠做David老細咁過癮，唔使特別寸，就係咁日日叫David日日陪我落老蘭，睇吓佢點反應都夠爽，結果開心到瞓唔著。人係咁，有時諗嘢好cheap。
不過Peter第二日瞓醒返工，一路揸車一路思考，發覺自己好細路，決定同David傾傾再算。返到公司叫秘書約David出來食飯，因為唔想在公司見好似同佢面試咁，秘書問去邊間食，Peter脫口而出那間中環最貴的意大利餐廳，即係佢走咗後David約佢去的餐廳! 秘書好快約好，Peter心諗自己約去那間餐廳同Peter食飯，好有「吐氣揚眉」的報復心理喎。
Peter一見David，已經覺得好唔妥，呢個已經係另一個人，唔係佢以前識的David，以前充滿自信的他，如今講嘢有少少結巴，或者唔係講嘢問題，係唔想講嘢的問題。David首先道歉，話寫信去求職前應該先打個電話俾你，但係實在打唔出手，所以無打。(Peter心諗，死唔認衰的David，過去一定唔講呢啲話)跟住David話一啲唔介意做 Peter的手下，但求搵番份似樣的工，過番以前的生活。
Peter多口問句生活如何，David話唔好提啦，無工之後，老婆要走，佢一啲都無爭論，俾咗紐約間屋佢(在紐約買定間apartment本來想實現他殺上總部的夢想)，老婆帶咗三個子女走咗。Peter睇到David好唔捨得啲仔女，不過David話無計啦，我搞到咁，日日俾老婆窒，再唔分開，「我怕佢俾杯士多啤梨奶昔我飲」。Peter諗一諗先至明，佢係講緊美林亞太區董事簡崇諾(Robert Kissel)，佢老婆俾杯有毒奶昔佢飲死咗。簡崇諾又係住喺陽明山莊， David應該識得佢。Peter應咗句:「唔會啩!」但係覺得David好認真咁講，可知婚姻關係幾差。
講到呢到，大家有點無言以對，Peter已經打定主意，唔可以請David，請咗佢不但唔可以玩佢，仲要全力幫佢，咁樣點做得出捽佢數呢? 隨時成為自己負擔，私心點講，David交唔到數時，又唔炒得，怕俾人話公報私仇。Peter轉數好快，話有間中資大行想在香港大展拳腳，有個高位打鑼咁搵人，不如介紹你去仲好啦，你唔使同我打工啦。David大喜過望，Peter即刻一個電話打俾那間中資銀行北京總行的陳總，撮合此事，結果David一個月後在中資銀行返工啦。
食完餐飯，Peter有個體會，正如UNIQLO老闆柳井正所講，成功可以一日丟棄，唔好俾自己衰，衰咗好慘，喺呢一行，唔向上爬，就向下滾，無中間路線架。
陸羽仁
回應(2) 我想回應
陸羽仁 BLOG 舊文