Prof J財技特訓班：綠色動力後台堅
■直軍(左二)任主席的綠色動力環保背景夠堅，而且盈利仲頂瓜瓜。資料圖片
近排IPO新股，好似哥哥嘅金曲一樣熱辣辣(Prof J最愛嘅金曲之一，唱K必選)，乜嘢類型都有，花旗參、環保、中藥等，真係花多眼亂。
識得我都知道其實我就好少抽新股，鍾意上市後用IPO新股投資法入市，雖然冇乜參考，但係價量分析成為咗我最緊要嘅投資工具，一搜到好嘢，Prof J就會全力咁係市靜嘅時候，勤力地追蹤，放心啦！
近呢幾年中國棄置垃圾量急速上升，生活垃圾量每年高達1.6億噸，人均垃圾年產量有成440公斤咁多，垃圾按年增速超過10%，原來中國嘅垃圾增長速度真係非常之恐怖！
純利率達15%
當企業見到呢個咁好嘅商機，梗係衝入去，你哋估下回收企業有幾多間？100間？1,000間？定係1萬間？
通通都錯，原來睇返有關數據，去年內地再生資源回收企業一共就超過10萬間。當中就處理垃圾分為類為廢鋼鐵、廢有色金屬、廢塑料、廢輪船、廢紙、廢棄電器電子產品、報廢汽車、報廢船舶八大類型，八大類型的回收總值高達到4,817.1億元。
咁多間公司點先做到回收行業嘅大佬呢？梗係要背景要夠堅，而且盈利能力都要頂呱呱。新股綠色動力環保(1330)係一間由北京市政府授權嘅大型國有投資公司。
綠色動力對垃圾焚燒發電廠投資、技術顧問、興建、營運同埋保養有一條龍服務，公司仲有成七項於內地營運嘅垃圾焚燒發電項目，11個發展中項目，加上綠色動力同泰國、馬來西亞簽咗不具法律約束力嘅框架協議，當雙方互相合作，前景又睇高一線。
睇埋綠色動力嘅盈利能力，佢喺2012、2013年每年純利率分別就有成15%咁多，如果將價值鍊成熟化，令到攻擊性強，會有真正嘅「N稿」，睇準機會出發！
徐燦傑
中國銀河國際財富管理主管
本欄逢周四刊出
徐燦傑
Prof J財技特訓班 - 徐燦傑 舊文