金融High Tea 2014年9月4日
盲俠都射中
2014年09月04日
大市唞咗一輪，終於出現爆發性上升，藥引係內地A股五連升，於是出現報復式夾上。家全球投資市場，受到新一輪放水牽引的情況逐漸明顯，歐洲經濟唔掂，月中好可能就會量寬出台，日本經濟同樣係樣衰衰，搞嚟搞去除咗印銀紙似乎無乜招數。
人比人下，美國雖然係中人之姿，但係熱錢眼中已變成靚女，係咁掟水力追，搞到美匯指數大升，反映資金係咁湧入美元資產，港元同美元掛鈎，基本上都係以美元計算嘅市場，理論上都會有好處。
政改落閘 股市開閘？
本地方面仲多咗一瓣因素，係滬港通愈嚟愈近，炒作滬港通概念日漸濃厚，喺A股帶動下，恒指一吓就重越兩萬五千點關口，由佢爆嘅力度嚟睇，如果內地個市無大調整，應該仲有一段衝吓。
內地經濟數據佳，上證指數四連升，帶挈港股全日抽升逾五百點，恒生指數全日收報25317點，升568點；國企指數收報11312點，升346點，要留意係成交增加至1005億元，有口痕友笑言，中央政改落閘，但股市就開閘，而且水頭仲洪洪聲添。
藍籌股中最搶眼嘅係獲麥格理升評級及目標價的中移動(941) ，重返「紅底股」之列，全日漲3.7元或3.78%，收101.7元；港交所(388) 走高6.3元或3.57%，收報182.9元。
內地A股四連升，中資金融股表現神勇，國指成份股首四隻升幅全屬此類股份。另外，蘭州今起取消限購令，內房股也回勇。
藍籌同中資股大力炒上，禾雀亂飛下，真係幾乎盲俠都射中，有幾隻股份喺手，就點都有得食吓胡，故此股民快樂指數，昨日肯定飆升！雖然咁好環境，但唔同股票點都有分別嘅，好似本地地產股，今鋪就輪到李四叔隻恒地(012) 最威嘞。
李四叔早排頻頻入市，公司披露佢老哥用咗6億幾元增持，好快就有大行慧眼識靚股。瑞信發表報告，恒地受惠一手市場旺盛，加上主席增持，維持「跑贏大市」評級，目標價64.1元，報告一出，恒地股價爆升咗6%，唔止跑贏大市，直情係犀利。
瑞信估計，四叔將會持續增持，因現時股價比每股資產淨值(NAV)折讓36%，仲話主席佔每日該股成交46%，形成股價上升的主要支持動力，加上現時一手市場旺盛，料恒地折讓可進一步收窄。該行估計，8月開始推行補地價仲裁先導計劃，該行相信計劃若有任何重要突破消息，將有利恒地估值進一步評級。
黃金地靚價賣帶起地產股
唔知四叔係咪非常睇好本地物業市道，佢入市買股之餘，恒地亦以高價擊敗不少強手，投到尖沙咀中間道15號停車場地皮，作價46.88億元，比市場預期上限仲要高。
呢塊黃金地係尖沙咀商業及旅遊核心區，為近年鄰近地段罕有新土地供應，市場對地皮估值介乎20.5億至45.1億元，以可建樓面計算，呎價介乎於6035至13276元。
今次招標共有18間發展商參與，除了本港幾大財團，中資房企世茂(813) 都有落場。
中間道地皮賣得咁好價，附近有地皮的公司都得益，最大贏家當然係擁有舊新世界中心原址的新世界(017) ，有人話單係呢塊地加埋K11，已經等如新世界市值咁滯，其他都係附送。新世界應聲彈高，但相比恒地就仲係大落後。
其他好似喺尖沙咀有物業，又建議賣嘢俾大股東派特別息的華置(127) ，亦接連第二日急升，升咗接近8%，報23.7元。
陸羽仁
金融High Tea 舊文