陸羽仁 BLOG 2014年10月16日
抄底
2014/10/16 9:40:32
網誌分類: 經濟
美國是一個典型怕通縮市的形態，股市大插，債息大升，昨日開市後15分鐘，杜指己插290點，資金湧入債市，債息大跌至1.86厘，股市上半場插完又插。
成個市震騰騰，股市恐懼指標VIX指數中午一度狂飆上31點嘅兩年半高位。杜指中午一度大插460點至15855點，連萬六點都失守埋。午後有撈底盤入市，大市由低位反彈，跌幅一路收窄。杜指收復萬六點關口，收報16142點，跌173點，跌幅1.1%；標普500指數跌15點，收市報1862點，跌幅0.8%，納指跌12點至4215點，跌幅0.3%。標普500指數及納指昨日中午一度跌穿去年底收市價，全年見紅。尾市失而復得，可見不少抄底盤入場，博個市短期見個小底。債價隨股市反彈而回吐，債息回升，10年債息收2.08厘。
昨日美國市受歐洲通縮、中國放慢、伊波拉蔓延幾重打擊。中國9月通脹率得1.6%，令本來好差的歐洲市場更驚。歐洲股市先插，法國股市大跌3.6%，德國股市跌2.9%，英國股市跌2.8%，所以美股早段下跌，同歐洲股市好有關。到歐洲收市，美股再插多一浸就見咗個小底，最後杜指跌1.1%，比歐洲跌少好多。
伊波拉病毒在美國蔓延，就係美股的本地弱因。美國德州達拉斯市(Dallas)證實有第二名護士感染伊波拉病毒，這名護士之前照顧過上周死亡的伊波拉病人。她今個月8號達拉斯市飛到克里夫蘭，周一回來搭邊疆航空(Frontier Airlines)，昨日發病。同機有138名乘客，仍未知有否感染病毒，再加上有消息傳總統奧巴馬延遲原來外訪行程，留在白宮商討對付伊波拉病毒方案，令形勢顯得更加嚴峻。航空及酒店般重創，連累整個股市，之前升得比較大嘅電腦科技股亦跌到四腳朝天。
伊波拉病毒拖低美股，我覺得病毒其實只係一個觸發點，投資者最唔喜歡嘅就係不確定因素，忽然擴散嘅伊波拉病毒，又唔知醫學界如何處理，就係一個不確定因素。
我估計伊波拉病毒對市場的壓力仍會繼續，愈發更多染病個案，個市受壓愈大，這個情況要等到投資者認為美國的疾控中心(CDC)以及醫院方面能夠完全控制疫情，個市至會擺脫病毒對大市的影響。睇昨日除咗航空酒店等相關股下跌，鐵路股及運輸股亦大插，反映跌市都幾擔心美國以至全球經濟放緩。
不過美股跌咗咁多，一搵到個小底就會彈一彈，短期造淡者亦要小心。
陸羽仁
回應(13) 我想回應
陸羽仁 BLOG 舊文