金融High Tea 2014年10月16日
縮住炒
2014年10月16日
美股近日乏力，我要講嘅係除咗股價、油價、債價近日都有異動，我喺網誌都有討論，形容呢個係「通縮市」，呢個大環境對投資方向會有明顯影響。
香港跟A股炒放水
近日美股跌，美債升，加埋油價尋底，幾個現象反映市場對經濟前景唔係咁睇好，主要係歐洲經濟增長前景模糊，內地仲係處於調整期，靠美國單天保至尊，在美國聯邦儲備局即將完成退市，加息擺上議程下，市場有啲擔心美國消費無以為繼。
由於美國債務龐大，息口上調等於政府同私人同時少咗錢使，咁搞法會唔會窒礙而衰退呢？喺呢個憂慮下，三十年美國債息再跌低過三厘，十年債息跌至兩厘二，如果只係睇債息表現，邊個敢話美國實會喺明年上半年加息？
美國復甦由底回升，都驚通縮殺埋身，內地情況當然唔好得幾多，內地9月份通脹率回落至1.6%，創超過四年半新低，而且低過市場預期，主要受食品價格回落所影響。另外，樓價調整亦帶來物價壓力。匯豐銀行首席經濟學家屈宏斌就話，通脹數據反映內地通縮風險正在上升，原因是內部需求疲弱，亦印證經濟存在下行風險，佢估計人民銀行未來數月需要進一步放鬆政策。
內地證券股有景
實體經濟驚通縮，但投資者反而憧憬在經濟下行壓力增加的情況下，人行將推出更多貨幣寬鬆政策刺激經濟，加上滬港通如期在10月27日推出的預期升溫，刺激滬深股市向好。上證指數尾段愈升愈有，以近全日高位收市，收報2373點，漲14點；深成指收報8198點，漲58點。
各板塊普遍上升，市場消息指，有多間證券商獲批開通港股通業務，刺激證券股普遍造好；受惠降息預期升溫，內銀股亦有支持。喺A股效應下，香港掛牌的證券股同內銀股都造好，中州證券(1375) 午後升幅擴大至逾兩成，因得益於獲開通港股通業務，股價高見3.53元，升21.72%，以創上市新高收市。
雖然市場炒內地會放水，但入市資金仍然審慎，成交縮至622億元，指數臨近尾市升勢放緩至不足一百點，恒指收報23140點，升92點；國企指數收報10284點，升30點。
喺通縮陰影下，國際油價重創逾4%，三大石油股齊跌。中石油(857) 收報9.32元，跌0.18元或1.9%；中海油(883) 報12.26元，降0.26元或2.08%；中石化(386) 報6.63元，走低0.02元或0.3%。
油股之失 飛機股之得
三桶油上季表現超靚仔，成為反彈市的領頭羊，不過如果當時無食胡，家大部份升幅已經蒸發，說明喺大型上落市中，若然有錢唔賺，好易變成一場遊戲一場夢。
不過，石油股之失，就變成航空股之得，內地三大航空股急升。國航(753) 造4.89元，飆0.13元或2.73%；南航(1055) 一日升咗0.14元或5.49%，造2.69元；東航(670) 升得仲勁，升咗超過咗6%。相比之下，穩穩陣陣嘅國泰(293) 變成大笨象，只係象徵式升0.58%。
個市炒通縮，大家對前景有所保留，未睇清楚前自然唔會落重注，咁就令到股仔同新股有繼續炒，尤其家資金成本咁平，好多三幾毫子的股仔就輪流癲炒。
今日幾隻新股掛牌，暗盤同樣造好，最勁係超額859倍，要認200手至穩分一手嘅保健品及個人護理產品經銷商衍生集團(6893) 暗盤市場報約1.5元，較招股價1.18元，高近27%，而且暗盤成交有成過千萬元，總之你敢炒就有散戶落疊！
陸羽仁
金融High Tea 舊文