金融High Tea 2014年10月17日
市底弱
2014年10月17日
美股前晚上演驚險場面，杜指一度下跌近四百點，收市跌幅雖然收窄至173點，但氣氛已經虛怯咗。港股開市即軟，但因為之前已經跌咗落嚟，所以跌幅唔算勁，跌幅一度收窄至百餘點，到下午歐洲開市，沽壓又大番，結果跌咗二百幾點收市，試底壓力未除，呢啲咁嘅市都係小心為上，若然個市反彈，應該係趁高減持而唔係咁快撈底。
豬肉股受累通縮陰影
家全球資金都因為通縮威脅，尋找避風港，最緊要係歐洲同內地情況都令人關注。澳新發表報告指，中國9月份新增人民幣貸款上升至8572億元，略高於市場預期。新增貸款恢復到正常水平，反映出人行定向寬鬆政策開始收效。但社會融資數據保持疲弱，9月份為1.05萬億元，低於8月份的1.4萬億元。這意味影子銀行系統去槓桿化持續。預料未來人民幣繼續放鬆貨幣政策，不排除未來人行可能降低存款準備金率50個基點甚至降息的可能。
大市喺通縮陰影下，恒生指數收報22900點，跌239點；國企指數收報10185點，跌99點，跌市成交增，升至近686億元。經濟若然收縮，對金融業會有負面影響，匯控(005) 滑落0.95元，收77.65元。
中國北車(6199) 及南車(1766) A股升停板，因投資者關注總理李克強之前訪問俄羅斯的「高鐵外交」，加上發改委公佈三項鐵路項目批覆涉近千億元人民幣，高鐵概念股逆市升，南車H股升近6%。
個股方面，內地物價有下跌壓力，其中食品類係一大板塊，豬肉股萬洲國際(288) 再創掛牌後新低。萬洲上市時已經減價，好多大行都話平，點知上市升咗一陣就掉頭回落，跟住仲破埋招股價6.2元，昨日收報5.91元，變咗賤物鬥窮人。
中州食胡回吐急
滬港通若要喺今個月開通，按時間計要在今個星期就公佈，當「死線」愈嚟愈緊，部份炒作呢個概念嘅股民就決定食咗胡先，炒中港互動喺周初急升的中州(1375) 尾市沽壓湧現，跌逾5%收市。
美國商務部周三確定對進口的中國製冷劑徵收高額關稅，稱該商品在美國售價過低，而且是利用中國政府的補貼進行生產，最終關稅介於282.54至303.42%。受到影響的公司包括香港上市的山東東岳集團(189) 。
佔領運動峰迴路轉，欲斷難斷。本來以為警方拆走障礙物會慢慢搞掂單嘢，點知突然又爆單疑似警察打人事件，跟住美國佬加把嘴，咁拖落去真係怕夜長夢多。
反常嘅係，樓市就好似當呢單消息無到，發展商繼續賣樓，最神奇係又畀佢賣到，剛剛投到大圍站的新世界發展(017) ，股價都彈咗一彈，反映市場對佢追入大地皮無乜厭惡感。
本來物業係不動產，加上要借貸購買，最怕政治不明朗，點知樓市至今當佔領運動無到，想趁機會執平樓者暫時仲要等吓。
樓價唔跌得，有人歸咎建築成本升得太快，家市區舊樓一呎賣緊八、九千元，但建築費已經要四千元樓上。建造業最近公佈新一年加薪，不同工種平均加幅接近一成，個別工種加一成六，有人話樓市好似玩緊冰火，地價因為供應增加回落緊，但建築費就因為多咗人起樓搶得仲高，一冷一熱上下夾攻，咁嘅現象真係多年未見。
不過，如果未來供應增加，成個經濟又因為加息同佔領運動等因素拖慢咗，樓價喺冰火交煎下，又係咪可以長期維持咁硬淨呢？
陸羽仁
金融High Tea 舊文