金融High Tea 2014年10月27日
油價大跌 炒作有「機」
2014年10月27日
美股繼續炒反彈，杜指上周五升127點，成為今年表現最理想的一周。不過，聯儲局周三將結束會議，量化寬鬆(QE)結束，未知加息前景如何，預料本周美股投資氣氛會比較緊張。估計港股今天會隨美股反彈，但佔中未止，旺角隨時清場，政治低氣壓持續壓住股市。
在中環和茶友食飯吹水，話金融界流傳一個陰謀論，話有支持佔中大戶沽空了大量期指，想隊低個市獲利，阿爺條氣好唔順，在本月期指結算前都會頂住個市，唔畀造淡的大戶食胡，過完周四結算先至清場，要清先清旺角，成件事在下個月搞掂，唔畀造淡大戶食爆棚。仲話上周五匯控(005) 、騰訊(700) 跌咁少，中移動(941) 仲要倒升2.2%，就係托住大股頂住個市。
呢啲陰謀論好難盡信，但阿爺唔係幾想個市大跌又唔係好出奇，因為內地好流行話呢一場係金融戰爭，話老外大國借香港去狙擊內地金融改革中的金融體系，都可以影響內地決策層的思維。
阿爺未必想大插
陸羽仁和官場中人食飯，都證實咗「一日佔中未完，一日滬港通唔通」的消息。我話點解啲高官仲話「滬港通未通和佔中無關」，官場中人一臉苦笑。我估現時局勢咁亂，高官都係隨意發揮，無想清楚為官者只可以講半真話(half-truth)，不能講假話的基本原則。若然明知有關，點可以話無關呢？
阿爺唔開通滬港通，暫時又無正式公佈，拖住拖住，客觀上減少了對市場的衝擊力，試想若阿爺正式講「滬港通暫時唔通」，個市起碼要交番500點出來，家唔講，高官又話唔係同佔中有關，大家唸唸有詞「睇唔到睇唔到」，個市又守到23000點。不過過完結算後，特別係萬一清場唔係咁順利時，個市的真正考驗才到。(陸羽仁的立場是唔理炒股係點，都希望可以不流一滴血)暫時估計本周個市還是拉鋸居多，但要小心美股大幅反彈後有回吐，咁亦會拖低港股。
最近留意到一個題目好有趣，就係油價大跌。紐約期油今年6月由高位每桶107.26美元，跌到上周五收報81.01美元，較今年高位跌了24%。我一直是油價淡友，早前都寫文講過，美國開放頁岩氣，今年5月開始出口石油，慢慢會變成石油淨出口國；歐洲經濟唔得，中國經濟放緩，油價怎可以長期企在100美元以上的高位？
油價終於回落，而且跌勢甚急，除了上述原因，還加上一個因素，佔領了敘利亞和伊拉克大片地區的極端組織伊斯蘭國(ISIS)，在黑市大量低價倒賣石油，自然會拖低油價。
ISIS低價賣原油
美國市場訊息商IHS Inc.近日發表報告預計，伊斯蘭國在黑市出售石油，一年就可非法賺取8億美元，每日賺200萬美元。另外智庫布魯金斯學會的研究員Luay al-Khatteeb話，伊斯蘭國現控制伊拉克和敘利亞大片土地，他們掌控伊拉克北部7個油田和兩家煉油廠，控制敘利亞東部6個油田，估計ISIS控制約60%的敘利亞油田和伊拉克的眾多產油資產。
Luay al-Khatteeb指出，ISIS控制的油田每日產能達8萬桶，現在有半數仍在開採。ISIS透過黑市倒賣原油，許多都銷往敘利亞的中介人，然後由中介人送往土耳其、伊朗和西亞北部庫爾德斯坦地區的煉油廠。美國曾向土耳其抗議，但土耳其沒有採取有效措施，去切斷ISIS的黑市賣油管道，美國9月空襲敘利亞時，曾空襲有關運油設施，但看來成效極其有限，ISIS還在黑市大量賣油。
用油企業有着數
紐約期油上周五收報每桶81.01美元，IHS報告話，即使油價近期顯著回落，但ISIS其實以更低的價錢倒賣石油，每桶黑市價只是賣40美元，由於ISIS是騎劫了敘利亞和伊拉克的油田，完全不用考慮成本和低價賣油對產油國長遠的損害，一味賤賣搵錢。雖然ISIS賣油量不多，但全球的用油需求本已疲弱，再加ISIS的低價轟炸，油價就順勢急回。正常產油國在油價回落時會減產支持油價，但ISIS不會，估計佢如果想透過賣油日賺200萬美元，油價回落，黑市價跟住落，佢反而會賣得更多，以保持每日的套現量，成為拉低油價的重要因素。
ISIS促成油價回落，長線對用油國如中國有利，對用油企業如航空、航運、造紙、重工、石化行業有利，對油企不利，也要小心用油企業囤積了石油或相關期貨會中招。
我在今年6月油價上高位時，已預示油價將見頂回落，叫大家小心，只是無估到有ISIS這個因素，令油價跌得咁急。我在6月30日在網誌上寫到就快出現「石油變局」，估油價見咗頂，當時講到三大油股：「睇三隻油股走勢，就知道市場看法，最強的是集中做下游賣油的中石化(386) ，上下游平衡的中石油(857) 都可以，最弱是集中採油的中海油(883) ，似乎投資者都在賭油價見頂，睇住美國佬個局，若果你揸住呢三桶油其中一隻，就要好小心研判未來個石油世界係點。呢啲油公司早前有國家任務去對外收購，萬一油價大變，佢哋買落的項目就要重新估值。」
小心囤油股減值
如今油價急回，本來是中海油中招，中石化受惠，中石油都OK，但中石油高層接受《21世紀經濟報道》訪問時就表示，公司擁有大量石油商業儲備，在油價受壓下，需要作大幅撥備減值準備，未來利潤增長預測因此調低。在油價下滑的趨勢下，公司會盡可能降低一些高成本上游業務，以觀望未來油價走勢。
睇完中石油咁講，我對三大油企都有少少戒心。過去多年油價大升，令中國呢個經濟急促發展國家成本大漲，阿爺睇為石油戰爭，為未來發展打算，就叫幾大油企四出大拓油源，難免有高價入貨的問題。若我係分析員有時間，就會做報告分析幾大油企過去幾年的收購要減值多少。
ISIS唔易收科，經濟需求又弱，油價穿80美元之後，跌得咁急應有一輪反彈，但彈完後還似會再尋底。對用油企業如航空、航運、重工應有幫助。只是好多行業需求未得，所以又唔可以睇得太好。反而航空股可以留意吓，內地航空股以國航(753) 好少少，但我整體上對內地航空業有保留，需求疲弱勢將影響盈利，高鐵對內地航線的競爭又大，油價跌都未必補得番，比較下覺得香港的國泰航空(293) 好少少。
航空業界人士話，油價回到75美元以下時，國泰開始好景。聞說佢生意唔錯，特別係客運。雖然歐美關注伊波拉疫情，但至今長途客運如飛倫敦、紐約都仲好爆，暫時亦未見佔中影響生意，但我對大市仍有戒心，可等大市回落時，慢慢低價收集國泰，等明年首季公佈業績時收成，記着不用心急，唔平唔好買。
陸羽仁
金融High Tea 舊文