金融High Tea 2014年12月18日
洗太平地大減價
2014年12月18日
俄羅斯局勢未穩，美股先升後跌，港股繼續觀望，好彩內地上證指數再升逾1%，帶挈國企指數全日升過百點，稍為撐住市況，恒指收報22585點，跌84點；國企指數收報11269點，升132點，幾隻內銀股係推升國指的功臣。大市成交再過千億元，增至1078億元。
濠賭股打晒折
華潤集團證實掌管金融業務的副總經理蔣偉日前已離開華潤，傳捲入華潤集團原董事長宋林案，本港上市的華潤系股份全線下滑。由於佢哋有幾間係恒指成份股，都對指數有影響。跌得最多係華潤創業(291) ，收報15.22元，跌2.44%。
俄羅斯金融風暴繼續成為國際焦點，華爾街股市上日早段當佢無到，股市大幅反彈，但隨着油價再滑落，當日尾段美股軟番落去。睇嚟市場係驚聯儲局收緊貨幣的言論多過驚俄羅斯貨幣危機。雖然俄國風暴無對美國以至香港股市帶來好大衝擊，但個別同俄國做生意或者投資嘅公司，就難免受累。好似吉利汽車(175) 就受銷售下跌及俄羅斯盧布急瀉影響發盈警，股價隨之大瀉，收報2.59元，跌17%，其他汽車股亦受壓。喺俄國海參威興建度假村及賭場的凱升(102) 收報3.37元，跌16.4%，受俄羅斯盧布急跌影響，股價遭拋售，一下就大幅插穿4元關。
雖然指數跌得唔多，但濠賭股就再度急挫。習近平明日殺到澳門，洗太平地本來已經洗到白一白，另外又有報道話中央又推出重大措施，以打擊數十億美元非法資金透過澳門賭場流入。本來聖誕臨近，係澳門旅遊高峰期，可惜去年數字太靚，搞到股民患上畏高症，擔心今年數字不升反跌，股價喺節前已經大減價，銀河(027) 收報42元，一下插逾8%，金沙(1928) 跌穿埋40元，跌咗6.18%，好多澳門概念股，唔理係咪博彩生意，股價都打晒折，仲創埋今年新低，即係期內買親家帳面都要輸錢。
市場對濠賭股的憂慮唔係無道理，陸羽仁喺年頭叫股民沽濠賭股食胡，濠賭股跌到年中，我繼續叫大家離場，家佢插到今年新低，我仍然叫大家唔好撈住。有中環茶友話，陸SIR你使唔使淡成咁呀？習大大去澳門，會唔會有禮送呀？我就勸呢位茶友唔好太天真太傻，佢咁講係完全唔認識習大大啦。
習大大去澳門會唔會送禮呢樣，首先，澳門家唔係無得食、無得着，當地人均收入高過香港，喺咁嘅環境下，阿爺仲點解要送大禮呢？再者，家澳門幾個賭業集團老闆，都成為不同富豪榜的名人，若中央送禮係益到普羅百姓、抑或只是錦上添花呢？
以習大大性格，佢對大量祖國金錢喺澳門花清，無理由無意見，所以如果中央要送禮，好可能都係送佢幾句金石良言，叫佢哋唔好過份依賴博彩業多啲啦！
新股認購反應參差
茶友又追住問，就算無禮送，但家濠賭股都跌番去起步點咁滯啦，仲使唔使睇得咁淡呀又？我就話做生意同做人一樣，都係由儉入奢易，由奢入儉難，澳門博彩公司早兩年見好生意，高增長，個個爭住加大投資，基金見邊個落注落得勇就捧邊個，形成大家爭相起新場，家間間大企業，養埋好多人，如果做番以前一樣生意，咁就好難維持到以前的利錢，究竟呢次調整有幾深，暫時仲未見到，呢啲叫做同一樣的前景，不一樣的股價，所以家都未使咁急撈貨喎。好似銀娛咁，跌20元，反彈10元，博反彈走慢啲又被夾死。
近日新股掛牌表現參差，股民認購變得選擇性。市場消息透露，粵豐環保(1381) 國際配售超購五倍，傳有保險機構及基金公司入飛。該公司今天中午截止公開發售。
陸羽仁
金融High Tea 舊文