金融High Tea 2014年12月2日
外資鬥阿爺
2014年12月02日
油價上星期大跌，外資分析員譽為「第四次量寬」，認為平油降低生產成本，紓緩物價，推動經濟的作用不下於央行印銀紙。既然叫得做量寬，理應利好股市，點知港股唔理日股升、A股平穩，自己一頭就椿咗落嚟，下午仲愈跌愈多，好友傷到阿媽都唔認得！
望佢插穿兩萬三
有中環茶友話，港股人升我跌，係咪同班學生哥呼籲包圍政府總部，令人擔心場面失控有關呢？抑或係滬港通之後大家見到A股升不停，港股就弱弱吓，擔心資金被內地吸走晒呢？我就話兩樣嘢都有影響，但未至於影響咁大，以及一下子跌咁多啩。要留意就係個市喺結算後大跌，睇嚟外資係想造淡，呢個因素都唔好低估。
呢次牛熊角力，好有外資鬥阿爺嘅味道，中央上個月失驚無神宣佈滬港通，外資已經唱淡，話唔係咁有吸引力，到機制啟動，佢哋唔係咁捧場，港股首日跌市贈興。跟住阿爺又出招，突然落劑重藥，兩年來首次減息，老外依然唔賣帳，話擔心內地會步日本後塵，陷入長期迷失，唱淡格局未變。
上個星期，盧森堡突然傳出消息，話對滬港通保障投資者的安排唔係咁滿意，影響基金透過滬港通買A股。有人話基金返內地買A股唔係新鮮事物，點解突然會提出呢個問題，真係有點耐人尋味。無論點都好，內地減息本來係重大的利好消息，A股起勢炒，但從種種跡象顯示，外資唔係真係咁睇好，反而有小小等機會質低個市嘅感覺，所以你話佔領運動轉趨緊張又好；資金走上內地又好，這些因素唔可以話無影響，但似乎不能忽略的，是外資至少一過月底結算就想砌低個市。
早前有個講法，外資想趁佔中造淡，阿爺就暗中維穩，家睇嚟有小小呢隻味道。睇番個市好多消息都係預咗，好似內地採購經理指數PMI唔靚仔都係預期之內，其他唔覺有乜真正壞消息，若果講佔領再起哄，咁又值唔值跌600點咁多先？如果外資質低個市係為了炒作，股民又不必太過驚青，我就反而可能望佢再跌多一浸，最好係插穿埋兩萬三千點，咁有機會低位撈吓貨。
港股開市跌到收市，滬深股市個別發展，上證指數早段向好，升穿2700點，惟上月官方製造業PMI跌至50.3，匯豐中國製造業PMI創半年新低。投資者午後趁高位獲利回吐，銀行及保險股捱沽，拖累上證指數微微倒跌，未能企穩2700點，結束連續七個交易日的升市，上證指數收報2680點，跌2點；深成指報9095點，漲93點。
港股尾段再挫，恒指收報23367點，跌620點；國企指數收報10818點，跌327點，成交增至1051億元。藍籌股幾乎全軍覆沒，最傷係石油股續捱沽。昆侖能源(135) 報7.93元，瀉0.46元或5.48%，是藍籌中表現最差，中海油(883) 收10.72元，挫0.62元或5.47%，油田服務股亦急瀉。
國泰一枝獨秀
油價下滑有利航空股，航空股繼續有追捧。國泰航空(293) 收17.66元，漲0.58元或3.4%，是唯一上升的藍籌股。
大市風聲鶴唳，但對中廣核(1816) 上市暫時無好大影響，喺進入第三日招股後，綜合十間證券商共借出826.4億元孖展，較上周五借出765.93億元，增加近8%，相當於公開發售超額認購逾66倍。
主要從事生產高質量印刷電路板的恩達集團(1480) 截止公開發售。市場消息透露公開發售錄得逾30倍超額認購，招股價範圍是1.25至1.09元，公司今日會定價。
陸羽仁
金融High Tea 舊文