金融High Tea 2014年12月29日
20l5：A股牛市與石油熊市
2014年12月29日
我本來唔喜歡在年頭做預測，因為定時定候做預測，不一定係好時機。年頭老例想唱好，如果上年底已經升咗唔少，再唱好就好易中招，但今年真係口痕想預測一下，而且仲係升咗唔少或者跌咗唔少的市場，估佢哋仲有得去。
恒指近年尾都係23349點，同年頭差唔多，主要因為恒指成份股有升有跌，結果就打和。弱股以匯控(005) 為最，佢潛晒水，生意不前兼俾外國罰錢，年頭仲有82元一股，家得番74.25元。和黃(013) 亦唔好景，主要畀旗下赫斯基能源拖累，年頭95元，家只有90.65元。三大油股中海油(883) 、中石油(857) 、中石化(386) 唔使講，油價大跌，石油系股份因前中共政治局常委周永康受查拖累，全線向下。
強股主要係紅色股同本地地產股，今年跑贏晒大市，反映H股走勢的恒生H股指數基金(2828) 由年頭的107元，升至家116.6元(當中仲要計埋三大油股下跌的負面影響)，可見一眾紅色股走勢有幾強。若然睇內地A股就仲厲害，以最多人炒的安碩A50基金(2823) 計，佢年頭只有9.2元，家11.82元，升近三成。
今年年初四開工時，有四個美女同事去到我辦公室拜年，美女突然殺到，我派利是唔夠大封，就講股補數，打開電腦的股價圖，講2828和2823的走勢畀佢哋知。我以一個上落市為例，詳細講兩隻基金可能去到乜嘢低位，叫佢哋等到見低位買吓，高位沽吓，咁樣應該搵到10幾20%。
指數基金 低買高沽
有一個美女真係買咗2823，現已沽清，平均有22%回報。佢真係好似我建議佢咁，等到3月低位時入2823，入貨價8.3元和8.1元，揸住一直等到大升之後，在11月和12月分四注連環食胡，分別食11%至35%，平均食22%。其實佢對上一年已聽我建議入咗啲2823，價錢貴一啲，若然只計今年入的貨，分段出貨，回報有30%以上(2823上周三報11.82元，比她今年平均入貨價8.2元高咗44%！)。
講起呢件事，唔係想認叻，係想講兩點。第一，對唔太熟悉股票的讀者，組合主打買指數基金較好，衰咗可以守吓，好似2828咁，收2.6厘息，好過放在銀行。不善炒股者組合中買個別股票宜少一點，衰咗唔識走都無咁傷，指數基金持貨分散可以佔組合比例高啲。試想一隻股份如只佔組合10%，佢即使大跌一半都係全個組合唔見咗5%，若組合有75%係指數基金，搵到20%，一半等如全個組合賺15%，頂到跌嗰啲有餘。第二，即使一隻指數基金只係上落市，只要等到低位入市高位沽，都有理想回報。
講舊事無用，要講新鮮事。來年市道主要有兩大預測，就係A股牛市與石油熊市，一牛一熊，都隱藏風險，亦潛伏機會。
A股入牛 玩資金市
先講A股，睇隻2823，真係升得好得人驚，今年高位12.78元，現價11.82元，如果明年係一個上落市，咁家都係近高位，回落時隨時見番8元多。但我估明年A股係上升市，唔係上落市，所以即使回吐，都唔會回得咁深。
我估A股由去年7、8月見底回升，已步入牛市初段，到11月中減息後股市大升，正式確認牛市。呢個牛市的基本面同美、歐、日股的牛市來源一致，係經濟差政府放水帶來的牛市，不是由經濟繁榮帶動，係由經濟差政府印錢所帶動。所以經濟數據差唔再令股市下跌，反而會觸發炒作。
好像國家統計局上周六公佈，11月份全國規模以上工業企業實現利潤總額是6761億元人民幣，按年下降4.2%，跌幅比10月份擴大了2.1個百分點。工業利潤下跌主要因為工業品銷售增長再放慢，唯有減價促銷，令盈利空間縮小，煤炭、原油及原材料等上游基礎產品價格下跌近年低位，促使相關行業利潤萎縮。工業企業盈利下跌，係經濟步向通縮的先兆，阿爺唔可以畀經濟出現通縮，一縮咗就好難番轉頭，唯有放水救經濟，而且輕放水唔夠，仲要擺明車馬支持股市上升，搞旺個場，是一個典型「泡沫救經濟」的形態，對股市有利。
為防通縮 放水谷市
若然此方向正確，上證綜指現價3157點，我估2015年頗有機會升到4000點，若然係咁，即是還有26%的上升空間，這樣今年內地股市繼續跑贏美股。美股已是一隻升咗六年的老牛，標普500指數今年升近13%，較2009年3月低位已升咗207%，大行都估明年唔敢估得太好，一個向華爾街15個最勁策略師所做的調查顯示，他們預測標普500指數明年有6.1%的上升空間，估得最低的是高盛和巴克萊，比上周五標普500指數收市只有0.6%的上升空間，即係無升跌，預計A股明年會跑贏，A股雖然會好過H股，但H股仍可有不俗升幅。
預計明年A、H股係上升市，和上落市的主要分別係上升市一級級上，回吐唔係跌咁多，再上升時又會升穿高位，所以唔可以睇得太低，有一定回吐就要吸納。我估經濟轉強阿爺始會停止放水，否則個市可以保持升勢。
油價續跌 俄國違約
第二個2015年焦點是油價續跌，俄羅斯有機會債務違約。油價跌到54美元，我估油價未跌完，有機會跌到35美元，係一個大熊市。俄國有67%出口同能源產品有關，經濟結構太單一，頂唔住油價大跌的衝擊，明年賴債的機會不低。若然油價大插有美國手影，俄國違約雖然會令金融市場都有啲波動，但美國預咗會出現，燒唔到美國。
估油價插到35美元，到時係買油股氣股的機會，買入坐一年，可望有20、30%回報。風險第一係跌唔到呢個深度買唔到，第二係買完油價再插到20幾美元。我擔心後者多啲，所以唔好現在太快一手入市，等等、慢慢買好啲。
雖然唔易估到油價底，一跌易跌過份，但油價好難長期企在20、30美元的低水平。家整個世界經濟規模擴大了好多，用油大增，加上好多油田、油砂生產成本在50、60美元以上，莫講頁岩油要70、80美元，油價大跌就大量減產，熊市就會見底，價錢先會升番上去。
所以2015買A、H股要順勢，小回要吸。等買石油相關股要逆勢，唔低唔好買。
陸羽仁
金融High Tea 舊文