一周三件：台泥宜趁低吸
■吳義欽任董事總經理的台泥國際，趁北水未大炒前，可先入定貨。 資料圖片
台泥國際（1136）獲納入港股通可買賣股份無幾耐，已開始有北水收集，而集團街貨市值奀豬豬，呢期北水瘋狂，遲早會俾同胞掃到甩轆嗰隻。
滬港通喺去年11月17日開波，到今年3月9日（星期四），台泥先獲納入為可買賣股份。港交所（388）網資料show，祖國資金由最初係靜蠅蠅，至到啱啱嘅上星期五，北水透過滬港通買台泥，持股量上到近990萬股。呢個變化，印證祖國同胞，𥄫到台泥呢件寶。又台泥頭兩位股東，合共揸咗台泥72.33%，街貨權益得27.67%，等值約30億元。呢期北水瘋狂，台泥街貨區區市值，算係乜？
受惠國策推動行業
又場內同樣係港股通嘅行家，有山水水泥（691）、安徽海螺（914）同華潤水泥（1313）。前邊兩隻表現最巴閉，山水水泥由去年11月到家陣，已經翻咗一番，又安徽海螺去到上星期四，同期最高累升38.4%。台泥又點？啱啱喺上月尾，先再創1年低位，呢期有北水青睞，開始瞓醒，但由低位計，家陣先累升得23%。
而場內專業評估，台泥今年度預測PE，得5.8倍，上邊山水水泥去到24倍、安徽海螺上到近12倍，潤泥8.3倍。就算台泥拼落潤泥度，PE都折讓咗30%。又阿爺推一帶一路國策，消化包括鋼材同水泥等產能過剩行業問題。呢壇製作已經開波，實際果效一反映，台泥預測PE仲低。
同樣場內專業評估，台泥今年PB得0.5倍，山水水泥1.3倍、安徽海螺1.8倍，潤泥亦上到1倍。台泥係大折讓咗50%，講PB，台泥又至抵。
呢一轉趁北水大炒台泥前，好入定貨，台泥係咁意追上潤泥1倍PB水位，現價（3.35元）係講緊要翻一番，上到6蚊樓上。
錢雋
細價股專家
本欄逢周二、三、五刊出
錢雋
一周三件 - 錢雋 舊文