金融High Tea 2015年4月9日
港股新常態
2015年04月09日
港股假後唔單止復活，簡直係雄壯，恒指高開400幾點，跟住一口氣飆高，中午已升700點，下午以為佢會回一回，點知佢再挾高，結果升成千點咁滯，而且成交有成2500億元。港股升得咁勁，一來係因為A、H股差價大，最重要係阿爺?家擺明放錢出來撐吓港股，內地背景資金搶先入場，個市就出現呢次「復活大爆炸」。
「港A股」復活大爆炸
陸羽仁呢排成日叫人低位買啲股，而且要買就買吓國貨。昨日就話「港股A股化」，會出現好多「港A股」，即係對應住內地同類股份炒的港股。以前話A股化，大家有啲驚驚哋，擔心咁代表劣質化，大股東走晒出來圈錢，小股東就俾人食晒。不過如今所講A股化，係話好似內地股市，由政策催生出一個牛市。
內地上證綜指由去年第四季開始2400點起步，一級級上升，第一波升到3400點回吐，然後再上，到呢輪爆升，已經逼近4000點水平。內地股市上升，除了希望製造一下財富效應，提振滑落的經濟。
今年兩會後，中央對股市有新態度，期望借助股市同金融令產業升級，即係期望把股市變成融資同投資渠道，同時導向把人民幣和中國企業帶出中國，喺咁環境下，中央樂見股市有序上升，形成一個政策性牛市。
至於陸羽仁講港股A股化，就係透過阿爺逐步放開內地買港股的大閘，北水開始南流，將呢啲政策紅利引入香港，將港股當A股咁炒，而且呢種狀況，套用阿爺講法，會變出一個「新常態」，即是北水主導港股走向的新常態。有人問，用番香港人熟悉的語言，你係咪話港股都出現牛市呢？紅色股係咪將北方嘅牛牛帶落嚟香港，最好用數字去分析，港股昨日無論指數同成交，都係破晒位，過去七年上上落落的通道，高位都在25000點多少少，如今大幅突破，一下子去到26236點，在昨日黃昏時夜期一度再升700點去到近27000點。呢個狂態，喺過去幾年來都未見過，而且仲係大成交配合下爆發出來，A股擺明係牛市，隻牛牛行埋過香港有乜出奇先？
牛市都要小心牛尾掃親
唔好話你哋，陸羽仁自己都未係好適應呢種A股炒法，唯有抱住開放心靈，懷着學嘢心態，觀察吓內地資金炒作手法。
聽完陸羽仁講，你會問咁係咪個市應該睇得好好先？講到呢樣？就要小心，因為好似昨日個市一日升成千點，好多股份20、30%咁升法，容乜易未到月尾恒指已經創32000點的歷史新高，跟住好多股升到爆埋？所以就算呢個市係牛市，都唔代表你今日一開市你就要撲入去搏命，因為無論內地同香港個市都升得好急，喺升得咁急下，回一回震盪都可以好大，投資者啣尾狂追，被牛尾掃一掃跌番10、20%都可以好傷，如果你被牛尾掃親，就唔好話陸SIR累你嘞！
我講?家港股係大時代，唔係叫你即刻入市，入唔入市好多因素考慮，包括你持貨長定短、手上貨多唔多、承受風險能力，同埋仲有你想買乜股，因為升市都有股份跌、跌市亦有股價升。依家畀個大時代嘅背景你，係想大家有個中長線少少的睇法。個市如果係上落市，咁就梗係要鋪鋪清，如果個市係反覆向上甚至係大牛市，咁唔係叫你唔食胡，而係食胡之餘，唔好動不動空倉，而係保持較正常積極見低補貨的心態。照估呢個新常態，可能仲有排玩嘅，我哋步入炒股大時代啦。
新華社連續第三日發表文章評論A股，強調經濟增速放緩對於股市的影響正逐漸淡化。全面深化改革釋放政策紅利，引領A股持續走高的深層次動力。喺內地「政策牛」推動下，恒生指數收造26236點，暴漲961點；國企指數收報13396點，升733點，全日成交金額達2500億元。A股連升第五個交易日，上證指數曾升至4000點，收市報3994點，漲33點，再創逾七年新高。內地兩市成交額超過1.5萬億元人民幣，都係破紀錄新高。
最特別係滬港通兩地成交冰火兩重天，港股通暢旺，首次用盡單日105億元額度。滬股通則遇冷，全日出現淨沽盤逾35億元人民幣。
陸羽仁
金融High Tea 舊文