中環在線：活化觀塘工廈 用七年心機終入夥
舖王波叔攜妻兒現身
■舖王鄧成波（右）一家罕有亮相。
人稱「舖王波叔」嘅殿堂級投資者鄧成波，近年都養尊處優，甚少出席一啲公開活動（或者臨時缺席）。但佢噚日就冒住嚴寒天氣，為自己持有嘅觀塘興業街4號全幢活化工廈舉行開幕禮。
已經81歲嘅波叔，噚
日朝早10點現身大廈開幕禮，由於氣溫只得攝氏9℃，波叔著住大褸、帶埋冷帽，做足禦寒措施。今次波叔罕有現身，同場除咗有最得寵嘅孻仔鄧耀昇（Stan）之外，連極少會出現嘅波嫂（Stan嘅媽咪）都有登場，可見波叔對呢幢活化工廈幾咁重視。
呢幢大廈喺2009年以1.78億元買入之後，申請活化成商舖與寫字樓用途，改建費超過1億元，擺咗7年心機落去終於入夥，所以波叔特別錫住呢幢物業。
■鄧成波喺租客嘅休閒空間扮打韆鞦。 
■呢幢觀塘工廈改建費超過1億。 寄語市民2018才上車
有一排冇見嘅波叔，睇落比之前老咗少少，但係仲好精神兼精靈，期間仲同Stan喺大廈其中一層商務中心嘅休閒空間，扮打韆鞦，童心未泯。而佢一講到樓市就更加滔滔不絕。波叔話：「早喺兩年前我已經話樓價太高，叫咗後生仔唔好買細單位，嚟緊呢兩年樓市都會慢慢調整。」佢又寄語一班想買樓嘅後生仔，「𠵱家都係唔好買樓住，2018年先至好上車」。
講到舖市，佢認為繼續跌租係大勢所趨，不過如果佢睇啱，都會買貨嘅，好似舊年底以近8億元買入嘅荃灣海濱廣場，月內就會完成交易。
負責興業街4號嘅Stan就話，項目約租出兩成，呎租由50至150元，9至11樓共提供500個工作座位與50個工作間，主要租畀時裝設計師創業，租金由1,500元起。
靚靚新抱陀住B捧場
鄧耀昇（Stan）係舖王波叔嘅第五仔，亦係孻仔。舊年底Stan嘅靚女太太葉靄璿（Vicky）有喜，波叔就快做阿爺，當然萬千寵愛在一身。噚日Vicky都有同老公一齊出席興業街4號開幕禮，而且仲帶埋爸爸（即係Stan外父）到場。Vicky喺衣著上特別花心思，用條頸巾遮住巨肚。
Stan近年同太太Vicky拍住上一齊大搞婚禮統籌公司「拉斐特」，估唔到工廈開幕，Vicky都咁捧場。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com